10 უკრაინელი ბავშვი სოციალური მომსახურების სააგენტომ სახელმწიფო ზრუნვაში გადაიყვანა. ამის შესახებ ინფორმაცია On.ge-ს იმერეთის სოციალური მომსახურების სააგენტოში დაუდასტურეს.

On.ge-ს ინფორმაციით, სოციალური მომსახურების სააგენტომ ბავშვები სახელმწიფო ზრუნვაში მას შემდეგ გაიყვანა, რაც დააკავეს ქალი, რომელიც ამბობდა, რომ მათი დედაა.

სოციალური მომსახურების სააგენტოში კი აცხადებენ, რომ ქალს შემაკავებელი ორდენი გამოუწერეს და ეს საკმარისი იყო ბავშვების სოციალური მომსახურების სააგენტოში გადასაყვანად.

ამავე სამსახურის წამომადგენლის მზევინარ ღაჭავას თქმით, 10 ბავშვიდან ორი სამედიცინო დაწესებულებაში რჩება და სახელმწიფო ზრუნვაში გამოჯანმრთელების მერე გადავა. ღაჭავა განმარტავს, რომ ბავშვებთან დაკავშირებით პროცედურები საგამოძიებო მოქმედებების მიხედვით წარიმართება.

On.ge-ს ინფორმაციით, ათი უკრაინელი ბავშვის საქმეზე დააკავეს ქალი, რომელიც ამბობდა, რომ მათი დედაა.

20 აპრილს ზუგდიდის საავადმყოფოში ათი უცხოელი ბავშვი კვებითი ინტოქსიკაციით გადაიყვანეს. ბავშვებს თან ახლდათ მეურვე ქალი, რომელიც უკრაინის მოქალაქეა.

როგორც შინაგან საქმეთა სამინისტროში On.ge-ს უთხრეს, ქალი 10 ბავშვით მოსკოვი-თბილისის რეისით 8 აპრილს ჩამოფრინდა. უწყებაში ამბობენ, რომ ისინი აფხაზეთში გადასვლას გეგმავდნენ.

სამინისტროში განაცხადეს, რომ 10 მცირეწლოვანი ბავშვიდან 4 დაბადებულია 2017 წელს, რამაც გააჩინა ეჭვი, რომ აღნიშნული შეიცავდა ტრეფიკინგის ნიშნებს.

შინაგან საქმეთა სამინისტრომ დაიწყო გამოძიება სისხლის სამართლის კოდექსის 143¹ მუხლის პირველი ნაწილით (ადამიანით ვაჭრობა — ტრეფიკინგი). გამოძიების ფარგლებში მიმდინარეობს თანამშრომლობა უცხოელ პარტნიორებთან.