სახალხო დამცველმა ნინო ლომჯარიამ პარლამენტში გამოსვლის დროს აღნიშნა, რომ "კანონპროექტის განხილვა იყო ფორმალური, მსჯელობა პროცედურულ საკითხებს ეხებოდა და დეპუტატების მხრიდან ემოციური მსჯელობა დააკლდა".

პარლამენტში მისვლის მიზეზთან დაკავშირებით სახალხო დამცველმა აღნიშნა, რომ ის პარლამენტში პოლიტიკური სიტყვის წარმოსათქმელად არ მისულა:

"მე შეიძლება ნაკლები დრამატიზმი და არტისტიზმი მახასიათებს, თუმცა მე ვფიქრობ, რომ რაც ვთქვი იყო იმაზე უფრო მკაფიო და იმაზე უფრო საგანგაშო ვიდრე შეიძლება ძალიან ბევრმა, ძალიან ხმამაღლა და ემოციურად გამოხატა ეს", — ნინო ლომჯარია.

უზენაესი სასამართლოს მოსამართლეთა არჩევის შესახებ კანონპროექტის განხილვაზე ომბუდსმენმა სიტყვით გამოსვლა თავად ითხოვა, რაც აპარატის არსებობის განმავლობაში პირველი შემთხვევაა. მისი აზრით, ეს ფაქტი ხაზს უსვამს ამ კანონპროექტის მნიშვნელობას და სახალხო დამცველის დამოკიდებულებას.

"ჩემი აქ გამოსვლის მიზეზი იყო თქვენთვის მეთქვა რას ამბობს საერთშორისო სტანდარტი ადამიანის უფლებების სფეროში და ჯერი თქვენზეა, პოლიტიკოსებზე როგორ გადაწყვეტილებებს მიიღებთ", — აღნიშნა ნინო ლომჯარიამ.

საქართველოს პარლამენტში უზენაესის მოსამართლეთა არჩევის შესახებ კანონპროექტს კენჭს დღეს, 19 აპრილს უყრიან. უზენაესის მოსამართლეთა არჩევის შესახებ ქართული ოცნების მიერ მომზადებულ კანონპროექტს მეორე მოსმენით კენჭს დღეს, 19 აპრილს უყრიან. ქართულმა ოცნებამ ვენეციის კომისიის რეკომენდაციების ნაწილი გაითვალისწინა, მათ შორის არამოსამართლე წევრებისთვის საკვალიფიკაციო გამოცდის მოხსნა და ინტერესთა კონფლიქტის ნაწილი. მმართველი გუნდის გადაწყვეტილებით, იუსტიციის საბჭოს წევრი, რომელსაც სურს უზენაესის მოსამართლეობა გამოეთიშა მოსამართლეობის კანდიდატების შერჩევის ყველა ეტაპს. ქართულმა ოცნებამ არ გაითვალისწინა რეკომენდაცია ფარული კენჭისყრის გაუქმების შესახებ და არც საბჭოს წევრებს ექნებათ გადაწყვეტილების მიღების დასაბუთების ვალდებულება.

ამავე თემაზე: