თბილისის სააპელაციო სასამართლომ გააუქმა საქალაქო სასამართლოს განაჩენი და ჯგუფურად, ანგარებით ჩადენილ განზრახ მკვლელობაში ბრალდებულებს სასჯელი გაუზარდა. დაკავებულებს 16-16 წლით თავისუფლების აღკვეთა მიუსაჯეს.

სასამართლო პროცესზე მტკიცებულებებით დადასტურდა, რომ 2017 წლის 9 აპრილს, საღამოს საათებში, თბილისში ორი პირი ერთ-ერთის ბაბუის მოკვლისა და მისი გაძარცვის მიზნით, მისსავე საცხოვრებელ სახლში მივიდნენ. ბრალდების მხარე ამტკიცებს, რომ მათ მოხუცს დანებით სხეულის სხვადასხვა არეში მრავლობითი ჭრილობები მიაყენეს. ხოლო მას შემდეგ, რაც დარწმუნდნენ მის სიკვდილში, კვალის დაფარვის მიზნით სახლში ხანძარი გააჩინეს და შემთხვევის ადგილიდან მიიმალნენ.

თბილისის საქალაქო სასამართლომ ბრალდებულები დამნაშავედ ცნო საქართველოს სისხლის სამართლის კოდექსის 109-ე მუხლის მე-2 ნაწილის ე ქვეპუნქტით და 187-ე მუხლის მეორე ნაწილით. პირველმა ინსტანციამ მათ დანაშაულთა ერთობლიობით სასჯელის სახედ და ზომა 14 წლით თავისუფლების აღკვეთა განუსაზღვრა, რაც ბრალდების მხარემ სააპელაციო სასამართლოში გაასაჩივრა.