აშშ-ს სახელმწიფო დეპარტამენტის ანგარიშს, სადაც საქართველოში ფულის გათეთრების პრაქტიკაზე, კიბერდანაშაულსა და ნარკოტრანზიტისთვის ხელსაყრელ მდებარეობაზეა საუბარი, პრემიერი მამუკა ბახტაძე გამოეხმაურა და თქვა, რომ გეოგრაფიული არეალი ყოველთვის პრობლემა იყო.

"ანგარიში თავისი შინაარსით ჩვენთვის მნიშვნელოვანია... ჩვენ აქტიურად ვმუშაობთ ჩვენს დასავლელ კოლეგებთან ერთად", — განმარტა ბახტაძემ და აღნიშნა ისიც, რომ დოკუმენტს ბოლომდე ჯერ არ გაცნობია.

იუსტიციის მინისტრი, თეა წულუკიანი ფიქრობს, რომ ანგარიშში პოზიტიურად არის ნახსენები დაბალანსებული ნარკოპოლიტიკის დამკვიდრება საქართველოში, მათ შორის ის, რომ ნარკოტიკის მომხმარებელს სამედიცინო დახმარება უნდა აღმოუჩინონ და უფრო მკაცრად უნდა ებრძოდეს მთავრობა რეალიზატორების საქმიანობას".

დეპუტატი თამარ ჩუგოშვილი ამბობს, რომ ქვეყანაში ნარკორეალიზაციასთან დაკავშირებული პრობლემების არსებობა მათთვის ისედაც ცხადი იყო და რომ ამაზე არა სახელმწიფო დეპარტამენტისგან, არამედ, მანამდე შს მინისტრისგან მოისმინეს.

პარტია ევროპული საქართველოს წევრის, სერგი კაპანაძის თქმით, ბოლო პერიოდში აქტიურად იჩინა თავი ისეთმა პრობლემებმა, როგორებიცაა, ფულის გათეთრება, ნარკოვაჭრობა, არალეგალურად მიღებული თანხები:

"ბუნებრივია, ამას ქვეყანაში აქვს ნოყიერი ნიადაგი. ერთის მხრივ, ეს არის გაზრდილი კრიმინალი, რომელსაც ხელისუფლება ვერაფერს უშვრება და მეორეს მხრივ, ეს არის ზოგადად, არაფორმალური, კლანური მმართველობა და კონკრეტული ადამიანების ინტერესების სხვადასხვა ფინანსურ სექტორებში".

ნაციონალური მოძრაობის წევრი, ხატია დეკანოიძე ამბობს, რომ ორგანიზებული დანაშაული, ფულის გათეთრება, ნარკოდანაშაული, სატრანსპორტო დერეფანი ტრანსნაციონალური დანაშაულისთვის, მნიშვნელოვანად აზიანებს ქვეყნის იმიჯს:

"მე სიმართლე გითხრათ არ მიკვირს, რომ საქართველო აშშ-ს სახელმწიფო დეპარტამენტის ანგარიშში მოხვდა ამ მიმართულებით".

რა წერია სახელმწიფო დეპარტამენტის ანგარიშში

ამერიკის შეერთებული შტატების სახელმწიფო დეპარტამენტის ანგარიშში "ნარკოტიკების კონტროლის საერთაშორისო სტრატეგიის შესახებ", საქართველო იმ ქვეყნების ჩამონათვალში მოხვდა, სადაც ანგარიშის მიხედვით, ფულის გათეთრება ხდება. დოკუმენტში ვკითხულობთ, რომ ფულის "გამთეთრებელის სიაში შემავალი ქვეყნების ფინანსური ინსტიტუტები ჩართულები არიან სავალუტო ოპერაციებში, რომლის თანხების უმეტესობა საერთაშორისო ნარკოტრაფიკიდან მოდის". ასევე, საქართველოში უკანონო შემოსავლების მთავარ წყაროდ საბანკო თაღლითობა და კიბერდანაშაული სახელდება.

ნარკოდანაშაულთან ბრძოლის კუთხით, ანგარიშში წერია, რომ საქართველო კავკასიაში გეოგრაფიული მდებარეობის გამო დაუცველია ტრანსნაციონალური კრიმინალური ორგანიზაციების წინაშე. დოკუმენტში ნათქვამია, რომ კვლავ გრძელდება ოპიუმის, ჰერონისა და ჰეროინის წარმოებისთვის საჭირო ქიმიური პრეკურსორის, ძმარმჟავას ანჰიდრიდის კონტრაბანდა.

ანგარიშის მიხედვით, აშშ აგრძელებს საქართველოს მხარდაჭერას კრიმინალის, ნარკოდანაშაულისა და ნარკოტრანზიტის წინააღმდეგ.