დიდი ბრიტანეთის ხელისუფლებამ ადგილობრივ მედიაგამოცემებს თავისი საიტებიდან ახალი ზელანდიის ტერაქტის ამსახველი ვიდეოების წაშლა მოსთხოვა. მთავრობის პრესპიკერმა განაცხადა, რომ თავდასხმის კადრები სოციალურ ქსელით სწრაფად გავრცელდა და მასალის წასაშლელად მათ უკვე მიიღეს ზომები.

"მთავრობისთვის ცხადია, რომ ყველა კომპანიამ სწრაფად უნდა იმუშაოს, რათა ტერორისტული კონტენტი წაშალოს. ტერორისტებს პროპაგანდისთვისა და რადიკალური შეხედულებების გავრცელებისთვის უსაფრთხო ადგილი არ უნდა ჰქონდეთ", — განაცხადა პრესსპიკერმა.

15 მარტს ახალ ზელანდიაში ორ მეჩეთზე თავდასხმის შედეგად 49 ადამიანი დაიღუპა, ხოლო 50-მდე დაშავდა.

ერთ-ერთმა თავდამსხმელმა 17-წუთიანი ვიდეო გადაიღო, რომელიც შემდგომში სხვადასხვა სოციალური ქსელით გაავრცელა. არსებობს მოსაზრება, რომ განხორციელებული თავდასხმა დასაწყისიდანვე ხალხის ყურადღების მიპყრობასა და სოციალურ ქსელებში გავრცელებაზე იყო გათვლილი.

ინციდენტამდე ინტერნეტ-ფორუმ 8chan-ზე, სავარაუდოდ თავად თავდამსხმელმა, გამოაქვეყნა ფეისბუქის გვერდის ბმული, სადაც ის ინციდენტის პირდაპირ ეთერში ჩვენებას გეგმავდა. მან ასევე 73-გვერდიანი მანიფესტი გაავრცელა, სადაც ის თავდასხმის მოტივებსა და სხვადასხვა საკითხზე საუბრობს. ფეისბუქმა აღნიშნული გვერდი და ვიდეო უკვე წაშალა.

თავდამსხმელის მიერ გავრცელებული ვიდეო და წერილი საზოგადოების ყურადღების მიქცევაზე იყო გათვლილი. ვიდეოს დასაწყისში თავდამსხმელი აცხადებს: "გახსოვდეთ, გამოიწერეთ Pewdiepie-ს არხი". PewDiePie, იგივე ფელიქს კელბერგი მსოფლიოში ცნობილი იუთუბერია, რომელსაც ამჟამად ყველაზე მეტი გამომწერი ჰყავს.

თავდამსხმელის მიერ გავრცელებულ წერილში შეხვდებით რასიზმსა და შეთქმულების თეორიას იმის შესახებ, რომ მსოფლიოში თეთრკანიანი ადამიანების დევნა მიმდინარეობს. მის წერილში ასევე ნახსენებია თამაში Fortnite და Spyro the Dragon. ისევე როგორც ქენდის ოუენსი, რომელიც ცნობილი ამერიკელი კონსერვატორია.

ამავე თემაზე: