ახალ ზელანდიაში განხორციელებული თავდასხმა დასაწყისიდანვე ხალხის ყურადღების მიპყრობასა და სოციალურ ქსელებში გავრცელებაზე იყო გათვლილი.

ოფიციალური ცნობებით თავდასხმის შედეგად 49 ადამიანი დაიღუპა, 20 კი სერიოზულად დაშავდა. ახალი ზელანდიის პოლიცია ქალაქის მოსახლეობას ამ ეტაპზე სახლში დარჩენას ურჩევს.

17-წუთიანი ვიდეო, რომელიც თავად თავდამსხმელმა გადაიღო ფეისბუქზე, იუთუბზე, ტვიტერსა და ინსტაგრამზე გავრცელდა.

ინციდენტამდე ინტერნეტ-ფორუმ 8chan-ზე, სავარაუდოდ თავად თავდამსხმელმა, გამოაქვეყნა ფეისბუქის გვერდის ბმული, სადაც ის ინციდენტის პირდაპირ ეთერში ჩვენებას გეგმავდა. მან ასევე 73-გვერდიანი წერილიც გაავრცელა, სადაც ის თავდასხმის მოტივებსა და სხვადასხვა საკითხზე საუბრობს. ფეისბუქმა აღნიშნული გვერდი და ვიდეო უკვე წაშალა.

"ახალ ზელანდიაში მომხდარი ინციდენტი პირველად 8chan-ზე დაანონსდა, თავდასხმა კი ფეისბუქზე პირდაპირ რეჟიმში გადაიცემოდა, ის მალევე გავრცელდა YouTube-სა და Reddit-ზეც. სანამ აღნიშნული კომპანიები რეაგირებას მოასწრებდნენ, ის მთელი მსოფლიოს მასშტაბით ვრცელდებოდა", - აცხადებს Washington Post-ის ჟურნალისტი დრიუ ჰარველი საკუთარ ტვიტში.

თავდამსხმელის მიერ გავრცელებული ვიდეო და წერილი საზოგადოების ყურადღების მიქცევაზე იყო გათვლილი. ვიდეოს დასაწყისში თავდამსხმელი აცხადებს: "გახსოვდეთ, გამოიწერეთ Pewdiepie-ს არხი". PewDiePie, იგივე ფელიქს შელბერგი მსოფლიოში ცნობილი იუთუბერია, რომელსაც ამჟამად ყველაზე მეტი გამომწერი ჰყავს.

"სრულად შეძრული ვარ, რომ თავდამსხმელმა ვიდეოში ჩემი სახელი ახსენა", - აცხადებს შელბერგი.

თუ შელბერგი აღნიშნულ შემთხვევას სასწრაფოდ არ დაგმობდა, შესაძლებელია ვინმეს გასჩენოდა აზრი, რომ მისი იუთუბ არხი თავდამსხმელისათვის რაიმე სახით ინსპირაციის წყარო იყო. თუმცა, შეტყობინების გავრცელებით, შელბერგმა აღნიშნული სიახლე დამატებით მილიონობით ადამიანს შეატყობინა.

თავდამსხმელის მიერ გავრცელებულ წერილში შეხვდებით რასიზმსა და შეთქმულების თეორიას იმის შესახებ, რომ მსოფლიოში თეთრკანიანი ადამიანების დევნა მიმდინარეობს.

მის წერილში ასევე ნახსენებია თამაში Fortnite და Spyro the Dragon. ისევე როგორც ქენდის ოუენსი, რომელიც ცნობილი ამერიკელი კონსერვატორია. აღნიშნული საკითხების ხსენება ემსახურება მიზანს, რომ ტერორიზმის თემა მედია საშუალებებში რაც შეიძლება დიდი ხნის განმავლობაში დარჩეს. თავდამსხმელებს სურთ, რომ საზოგადოებაში მათზე რაც შეიძლება დიდ ხანს ისაუბრონ. მის წერილში ნახსენები არიან სხვა თეთრი სუპრემასისტებიც. ასეთი თავდასხმების მიზანი უდანაშაულო მოსახლეობის შეშინება და სხვა სუპრემასისტების წახალისებაა.

თავდამსხმელთათვის ერთ-ერთი მთავარი მიზანი საზოგადოების ყურადღების მიქცევაა. სოციალური ქსელების მეშვეობით კი ახლა მსგავსი ინფორმაციის გავრცელება ისეთი მარტივია, როგორც არასდროს. ინტერნეტის ეპოქამდე მსგავს მასალებზე წვდომა მხოლოდ პოლიციასა და მედია სააგენტოებს ჰქონდათ. ახლა კი მისი გავრცელება მსოფლიოს მასშტაბით ნებისმიერ ადამიანს შეუძლია.

2015 წელს ვირჯინიაში თავდამსხმელმა ადამიანები პირდაპირ ეთერში დახოცა, ვიდეო კი Twitter-სა და Facebook-ზე ატვირთა. ყურადღების მისაპყრობად ორივე პლატფორმაზე ვიდეოები ავტომატურ რეჟიმში ირთვება. 2015 წლის ინციდენტის შემდეგ კი ამ პლატფორმებზე არაფერი შეცვლილა, შესაბამისად, ამჟამინდელი ვიდეოც სოციალურ ქსელებში სწრაფად გავრცელდა.

თავდაპირველი პირდაპირი ჩართვის თავიდან აცილება რთული იქნებოდა, თუმცა სხვა ადამიანების მიერ ხელმეორედ ატვირთულმა ვიდეოებმა ეს შემაძრწუნებელი ამბავი მთელ მსოფლიოს მოსდო.

ამ ვიდეოსა და წერილის სწრაფი გავრცელება იმის კარგი მაგალითია, თუ რამდენად გაუკონტროლებელია ინტერნეტი. მომხმარებლები ვიდეოს ატვირთვას YouTube-სა და Twitter-ზე განმეორებით კიდე ცდილობენ.

ახალ ზელანდიაში მომხდარი ინციდენტი ამ დრომდე განხორციელებულ მსგავს თავდასხმებს წააგავს. მასობრივი თავდასხმები შესაძლოა "გადამდები" იყოს, ხოლო რაც უფრო მეტი დამნაშავე მოხვდება მედია სააგენტოებისა და სოციალური ქსელების ყურადღების ცენტრში, შესაძლოა მით უფრო მეტმა ადამიანმა მოინდომოს მათთვის მიბაძვა.

ადამიანები სოციალურ ქსელსა და მედია პლატფორმებში ყურადღების მოპოვებაში უფრო და უფრო დახელოვნებულები ხდებიან, აღნიშნულ პლატფორმებს კი მოუწევთ ახალი მეთოდოლოგიების შემუშავება, რომლითაც ისინი მსგავსი ინციდენტების გავრცელებასა და თავდამსხმელების მიმართ გამოხატული მხარდაჭერის აღკვეთას შეძლებენ, წინააღმდეგ შემთხვევაში არსებობს რისკი, რომ ასეთ ადამიანებს უფრო და უფრო მეტი მიმბაძველი გამოუჩნდეთ.

ამავე თემაზე: