რამდენიმე ონლაინგამოცემა ახალ ზელანდიაში მეჩეთზე თავდასხმის, სავარაუდო, იარაღის ფოტოებს აქვეყნებს, სადაც ჩანს, რომ მჭიდებზე რამდენიმე ენაზე წარწერაა გაკეთებული, მათ შორის ქართულად: "დავით სოსლანი" და "დავით აღმაშენებელი".

ფოტო: Daily Mail

ლიტერატურის მუზეუმის ხელმძღვანელი, ლაშა ბაქრაძე ფეისბუქზე წერს, რომ მჭიდზე თურქ-ოსმალების წინააღმდეგ მებრძოლთა სახელები წერია:

  • მარკო მილიანოვი (Марко Мильанов) — სერბი მხედართმთავარი, რომელიც თურქი-ოსმალებისგან სერბეთის გათავისუფლებისთვის იბრძოდა;
  • სტეფან ლაზარევიჩი (Стефан Лазаревић) — სერბეთის მმართველი, რომელიც თურქებს ებრძოდა.
  • დმიტრი სენიავინი (Dmitry Senyavin) — რუსი ადმირალი, ათონის ბრძოლაში თურქები დაამარცხა;
  • ედვარდ კორდინგტონი (Edward Codrington) — ბრიტანელი ადმირალი, რომელმაც საზღვაო ბრძოლაში თურქები დაამარცხა;
  • მარკო ანტონიო ბრადაგინი (Marco Antonio Bragadin) — ვენეციელი მხედართმთავარი, რომელიც თურქების წინააღმდეგ იბრძოდა;
  • ერნსტ რუდიგერ ვონ შტარემბერგი (Ernst Rüdiger von Starhemberg) — ავსტრიელი მარშალი, იბრძოდა თურქების წინააღმდეგ.

ამასთან დაკავშირებით On.ge საგარეო საქმეთა სამინისტროს დაუკავშირდა, სადა გვითხრეს, რომ წარწერებთან დაკავშირებით ინფორმაცია არ მიუღიათ. გარდა ამისა, მათ გვითხრეს, რომ თავდასხმის დროს საქართველოს მოქალაქე არ დაღუპულა.

სახელმწიფო უსაფრთხოების სამსახურში აცხადებენ, რომ ამასთან დაკავშირებით პარტნიორებთან თანამშრომლობენ.

ფოტო: AP

ახალ ზელანდიაში ორ მეჩეთს თავს დაესხნენ, რის შედეგადაც 40 ადამიანი გარდაიცვალა, ხოლო 20 დაშავდა. პოლიციამ ოთხი ეჭვმიტანილი, სამი კაცი და ერთი ქალი უკვე დააკავა. ჯერჯერობით კონკრეტულად რამდენი ადამიანი მონაწილეობდა თავდასხმაში, უცნობია.

შეიარაღებული თავდასხმა ალ-ნურისა და ლინვუდის მეჩეთებზე განხორციელდა. როგორც ცნობილია, თავდასხმის დროს ალ-ნურის მეჩეთში 300 ადამიანი იყო. თვითმხილველები ყვებიან როგორ დაინახეს შეიარაღებული ადამიანი, რომელიც მეჩეთში შევიდა და სროლა დაიწყო.

შეიარაღებული თავდასხმის გამო ქალაქში ყველა მეჩეთი დაკეტილია. ამასთანავე, სკოლებში შეწყდა სასწავლო პროცესი და დაიკეტა საზოგადოებრივი თავშეყრის ადგილები.