ოკუპირებულ ტერიტორიაზე, გალის რაიონში გარდაცვლილ 29 წლის ირაკლი კვარაცხელიას ცხედარი ცოტა ხნის წინ წითელი ჯვრის თანხლებით გადმოასვენეს. ცხედარი ქუთაისის ექსპერტიზის ბიუროში გადაასვენეს.

შერიგებისა და თანასწორობის საკითხებში სახელმწიფო მინისტრის პირველმა, მოადგილემ რუსლან აბაშიძემ განაცხადა, რომ დასკვნები საბოლოო ექსპერტიზის შემდეგ გაკეთდება

სახელმწიფო უსაფრთხოების სამსახურმა 12 მარტს მიიღო ინფორმაცია, რომ გალის რაიონში დაკავებულმა საქართველოს მოქალაქემ, ირაკლი კვარაცხელიამ თავი მოიკლა. შემთხვევას გამოეხმაურა შერიგებისა და სამოქალაქო თანასწორობის საკითხებში სახელმწიფო მინისტრი, ქეთევან ციხელაშვილი. მისი თქმით, "სპეკულაციებს არ დაიწყებს", რადგან სხვადასხვა არხების მეშვეობით, გარდაცვალების გარემოებები დგინდება.

გარდაცვლილის მეგობარი ამბობს, რომ მისი აზრით, ირაკლი კვარაცხელია რუსმა სამხედროებმა ცემით მოკლეს. იგი სოფელ თაგილონისა და ნაბაკევის საოკუპაციო ხაზთან, გასულ კვირას დააკავეს. კვარაცხელიას მეგობარი იხსენებს, რომ ადგილზე შელაპარაკება მოხდა.

ოკუპირებული რეგიონის დე ფაქტო უშიშროების სამსახურის განცხადებით, 1990 წელს დაბადებული ირაკლი კვარაცხელია 2019 წლის 10 მარტს ე.წ. საზღვრის უკანონო კვეთის ბრალდებით დააკავეს. მათივე განცხადებით, პროცესუალური დოკუმენტების გასაფორმებლად დაკავებული რუსეთის სასაზღვრო სამსახურის განყოფილებაში გადაიყვანეს.