ეკონომიკისა და ეკონომიკური პოლიტიკის კომიტეტის თავმჯდომარე, რომან კაკულია, "კურიერის ვერსიას" უწოდებს გავრცელებულ ინფორმაციას, გახარია-ხაზარაძის შუამავლის ვინაობაზე. რუსთავი 2-ის ინფორმაციით, შუამავალი, სავარაუდოდ, ხაზარაძის ბიზნეს-პარტნიორი, ბადრი ჯაფარიძეა. კაკულიას თქმით, ამ ვერსიას დადასტურება სჭირდება, რის შემდეგაც, შესაძლოა, საპარლამენტო უმრავლესობა თიბისის საქმეზე საგამოძიებო კომისიის შექმნის აუცილებლობის წინაშე დადგეს.

"ამას პირდაპირ ვერ მივიღებთ, მე მგონი, როგორც უტყუარ მტკიცებულებას. თუმცა ეს ვერსიაც თავისთავად საინტერესოა და განხილვას საჭიროებს. ჩვენ ადრე თუ გვიან მოგვიწევს ყველა შეკითხვაზე პასუხის მიღება. მე არ ვფიქრობ, რომ დღეს ეს გონივრული ვადა ამოწურულია, როდესაც ჩვენ უნდა მივიღოთ ეს პასუხები, მაგრამ ეს ვადაც ძალიან დიდხნიანი ვერ იქნება. მე მოვუწოდებ მათ, რომ გადადონ ყველა საქმე და ძალიან მალე იყოს ეს არგუმენტები, რის შემდეგაც, შეიძლება დადგეს ნამდვილად საპარლენტო კომისიის შექმნის აუცილებლობა და ჩვენც ვალდებულები ვიქნებით მხარი დავუჭიროთ ამ ინიციატივას", — განაცხადა რომან კაკულიამ რუსთავი 2-თან საუბრისას.

თიბისის დამფუძნებელმა, მამუკა ხაზარაძემ მაშინ, როდესაც გიორგი გახარიასგან სავარაუდოდ მუქარის წერილის მიღების შესახებ პარლამენტში გამოსვლის დროს ისაუბრა, წერილის გადამცემი შუამავალი არ დაასახელა. წერილზე საუბრისას, ხაზარაძის ადვოკატმა ზვიად კორძაძემ თქვა, რომ შუამავალი არც გიორგი გახარიას ახლობელია და არც შინაგან საქმეთა სამინისტროში მუშაობს.

წერილთან დაკავშირებით პროკურატურამ მამუკა ხაზარაძე მოგვიანებით სასამართლოში გამოკითხეს. როგორც ხაზარაძემ თქვა, მან გამოკითხვაზე წერილის ასლი მიიტანა, ხოლო ორიგინალი კი ლონდონში ექსპეტიზაზე გააგზავნა.

წერილის მიღების შემდეგ პროკურატურამ განაცხადა, რომ ბრალდებაზე ინფორმაციას ამ ვერ გადაამოწმებენ, რადგან ბიზნესმენის წარდგენილი დოკუმენტი კომპიუტერში დაბეჭდილი ტექსტია და ავთენტიკურობის დადგენა შეუძლებელია. გარდა ამისა უწყებამ დოკუმენტი გაასაჯაროვა, რომლის მიხედვით, ხაზარაძეს სამ პირობის შესრულებას სთხოვდნენ:

• პირველი — ტელეკომპანია პირველმა შეიცვალოს სარედაქციო პოლიტიკა და ტელეკომპანია იმედის მსგავსად ჩაერთოს ომში ოპოზიცის წინააღმდეგ;
• მეორე — ხაზარაძემ გააკეთოს განცხადება, რომ მისთვის მიუღებელია ნაციონალური მოძრაობის რევანში და ბიზნესს კარგად ახსოვს, როგორ ექცეოდნენ წინა ხელისუფლების პირობებში;
• მესამე — ტელეკომპანია არტარეა, რომელიც ხაზარაძის საკუთრებაა, "დაეტყოს ობიექტურობის მაღალი ხარისხი".

თიბისი ბანკის საქმე

8 იანვარს გავრცელდა ინფორმაცია, რომ პროკურატურამ თიბისი ბანკიდან დოკუმენტები ამოიღო. მაშინ პროკურატურამ განმარტა, რომ თიბისი ბანკის 2008 წლის აქტივობები შეიცავდა ფულის გათეთრების ნიშნებს და მასში თიბისის დამფუძნებლები და ამავდროულად სამეთვალყურეო საბჭოს თავმჯდომარე, მამუკა ხაზარაძე და მისი მოადგილე ბარი ჯაფარიძე ფიგურირებდნენ.

ამ საქმესთან დაკავშირებით 13 თებერვალს საქართველოს ეროვნულმა ბანკმა მათი ხელმძღვანელი თანამდებობიდან გადაყენება მოითხოვა. თიბისი ბანკში ამბობდნენ, რომ აპირებენ სამართლებრივი საშუალებები გამოიყენონ ბანკისა და აქციონერების ინტერესების დასაცავად.

21 თებერვალს მამუკა ხაზარაძემ და ბადრი ჯაფარიძემ თანამდებობები დატოვეს. ეროვნული ბანკში განაცხადეს, რომ ხაზარაძის წასვლას მიესალმებიან. მათი თქმით, ეს დადებითად აისახება ბანკის გამჭირვალობაზე.

გარდა ამისა, თიბისი ბანკმა ეროვნული ბანკის წინააღმდეგ სასამართლო დავა შეწყვიტა და განაცხადა, რომ მილიონიან ჯარიმას გადაიხდის. ამასთანავე, ბადრი ჯაფარიძე და მამუკა ხაზარაძე ეროვნული ბანკის წინააღმდეგ კერძო დავას აგრძელებენ.