სტამბოლში დღეს რუსეთის, უკრაინისა და თურქეთის წარმომადგენლებს შორის სამმხრივი შეხვედრა გაიმართება. როგორც თურქეთის საგარეო საქმეთა სამინისტროს წყარომ "რია ნოვოსტის" განუცხადა, მოლაპარაკებები თურქეთის დროით 12:30 საათზეა დაგეგმილი (თბილისის დროით 11:30 საათი).

აღნიშნულია, რომ შეხვედრამდე რუსეთის, უკრაინის, აშშ-ისა და თურქეთის წარმომადგენლებთან მოლაპარაკებები გაიმართება. თურქეთის საგარეო საქმეთა სამინისტროს ცნობით, ისინი 10:45 საათზე დაიწყება (თურქეთის დროით).

თავდაპირველად, მედიაში გავრცელდა ინფორმაცია, რომ სტამბოლში რუსეთისა და უკრაინის დელეგაციებს შორის მოლაპარაკებები 15 მაისის შუადღისას დაიწყებოდა, მოგვიანებით კი 16 მაისისთვის გადაიდო.

15 მაისს სტამბოლში დაგეგმილ რუსულ-უკრაინულ მოლაპარაკებაზე უკრაინის პრეზიდენტი ვოლოდიმირ ზელენსკი წარმომადგენლობითი დელეგაციით ჩავიდა. რაც შეეხება რუსულ მხარეს, დელეგაციაში არც ერთი მინისტრი არ არის წარმოდგენილი და მოლაპარაკებებში არც პუტინი იქნება ჩართული.

როგორც DW წერს, რუსეთის ფედერაცია წარმოდგენილია მხოლოდ ექსპერტების "ტექნიკური ეშელონის" დონეზე. მოსალოდნელია, რომ დიალოგი გაიმართება დოლმაბაჰჩეს სასახლეში, სადაც რუსული და უკრაინული დელეგაციები 2022 წლის თებერვალში შეხვდნენ.

თურქეთში უკრაინის პრეზიდენტი ვოლოდმირ ზელენსკი უკვე შეხვდა თურქეთის პრეზიდენტ რეჯეფ თაიფ ერდოღანს.