პრეზიდენტ სალომე ზურაბიშვილის თქმით, შეწყალაბის კომისიის გადასვლა იუსტიციის სამინისტროშია გათვალისწინებული. პარლამენტში სიტყვით გამოსვლის დროს პრეზიდენტმა აღნიშნა, რომ კომისიაში დამატებით ჩართულნი იქნებიან სხვადასხვა ადმინისტრაციული ორგანოს წარმომადგენლები.

როგორც ზურაბიშვილმა განმარტა, კომისია ახალ კრიტერიუმებზე დაყრდნობით განიხილავს საქმეებს და მოამზადებს რეკომენდაციებს, საბოლოო გადაწყვეტილებას კი პრეზიდენტი მიიღებს:

"გადაწყვეტილების მიღებისას ვერ იქნება გათვალისწინებული პირადი, სოციალური, რელიგიური თუ პოლიტიკური ხასიათის ჩარევები. შეწყალება გამორიცხავს იმასაც, რომ საზოგადოებას ან კონკრეტულ ადამიანებს განემარტოს რომელიმე კონკრეტულ საქმეზე შეწყალების მიღების ან მასზე უარის თქმის საფუძველი".

სალომე ზურაბიშვილი მისი წინამორბედის, გიორგი მარგველაშვილის შეწყალების პრაქტიკას შეეხო და ამნისტიას მიამსგავსა.

"პრეზიდენტის დისკრეციული უფლება არც პირობით ვადამდე ადრე გათავისუფლების შემცვლელია და არც სასამართლოს ხარვეზების გამოსწორების მექანიზმი. შეწყალების დისკრეციული უფლება ნიშნავს პრეზიდენტის მიერ განსაკუთრებული და გამორჩეული ინდივიდუალური საქმის შერჩევას, სადაც უპირატესობა ჰუმანურ პრინციპებს ენიჭება. ამ პრინციპების ზედმიწევნით დაცვა ნიშნავს იმას, რომ შეწყალების აქტების რაოდენობა საგრძნობლად შემცირდება. ეს ასევე შეამცირებს რისკებს საზოგადოებისთვის, რომლებიც ყოველთვის თან ახლდა მასობრივ შეწყალებას", — აღნიშნა პრეზიდენტმა.

საქართველოს პრეზიდენტი სალომე ზურაბიშვილი საქართველოს პარლამენტში მოხსენებით პრეზიდენტის რანგში პირველად წარდგა. ზურაბიშვილის მოხსენებას პარლამენტში პრემიერ-მინისტრი მამუკა ბახტაძე, მინისტრთა კაბინეტის წევრები და დედაქალაქის მერი, კახა კალაძე დაესწრებიან.

ზურაბიშვილის გამოსვლას ევროპული საქართველო და ნაციონალური მოძრაობა არ ესწრებიან.

ამავე თემაზე: