საქართველოს პრეზიდენტი, სალომე ზურაბიშვილი გამოდის ინიციატივით, რომ ქვეყანაში ქართველოლოგიისა და კავკასიოლოგიის კვლევითი მთავარი ცენტრი აღდგეს. პარლამენტში სიტყვით გამოსვლის დროს მან აღნიშნა, რომ ეს ის დარგია, რომელშიც საქართველოს კონკურენტი ვერ ეყოლება და არ უნდა ჰყავდეს.

"ენათმეცნიერებისა დ ქართველოლოგიის გარდა ეს ცენტრი უნდა აწარმოებდეს ინტერდისპლინარულ კვლევებს საქართველოსა და კავკასიის შესახებ. ეს საშუალებას მოგვცემს, ჩვენ მივაწოდოთ საერთაშორისო საზოგადოებას ინფორმაცია საქართველოსა და რეგიონის შესახებ, და არა — სხვებმა", — განაცხადა პრეზიდენტმა.

ზურაბიშვილის თქმით, ასეთი ცენტრის არსებობა მნიშვნელოვანია და მას მხარდაჭერა სჭირდება, მათ შორის მართლმადიდებელი ეკლესიის საპატრიარქოს მხრიდან.

საქართველოს პრეზიდენტი სალომე ზურაბიშვილი საქართველოს პარლამენტში მოხსენებით პრეზიდენტის რანგში პირველად წარდგა. ზურაბიშვილის მოხსენებას პარლამენტში პრემიერ-მინისტრი მამუკა ბახტაძე, მინისტრთა კაბინეტის წევრები და დედაქალაქის მერი, კახა კალაძე დაესწრებიან.

ზურაბიშვილის გამოსვლას ევროპული საქართველო და ნაციონალური მოძრაობა არ ესწრებიან.