ევროპული საქართველო და ნაციონალური მოძრაობა პრეზიდენტის მოხსენებას არ ესწრებიან. ენმ-მ ამის შესახებ გუშინ 5 მარტს განაცხადა, ხოლო ევროპულმა საქართველომ განცხადება პარლამენტში პრეზიდენტის გამოსვლამდე რამდენიმე წუთით ადრე გაავრცელა.

ნაციონალური მოძრაობა აცხადებს, რომ სალომე ზურაბიშვილს პრეზიდენტად არ აღიარებენ და ამიტომ არც პლენარულზე მოუსმენენ. ევროპული საქართველოს ლიდერმა, გიგა ბოკერიამ კი განაცხადა, რომ საპრეზიდენტო არჩევნების დროს "ბიძინა ივანიშვილის ხელისუფლებამ" ამომრჩევლების მოსყიდვისა და ძალადობის ხერხებს მიმართა. პარტიის წევრებმა დარბაზი პროტესტის ნიშნად დატოვეს.

საქართველოს პრეზიდენტი სალომე ზურაბიშვილი საქართველოს პარლამენტში მოხსენებით პრეზიდენტის რანგში პირველად წარდგება. ზურაბიშვილის მოხსენებას პარლამენტში პრემიერ-მინისტრი მამუკა ბახტაძე, მინისტრთა კაბინეტის წევრები და დედაქალაქის მერი, კახა კალაძე დაესწრებიან.