მოქმედი და ყოფილი სოციალური მუშაკები, თავიანთი პრობლემების გასაცნობად, სახალხო დამცველს ხვდებიან.

საინიციატივო ჯგუფის, სოციალური მუშაკები სისტემური ცვლილებებისთვის წევრი, ქეთი ხუციშვილი ჟურნალისტებთან საუბრისას განმარტავს, რომ მათი მოთხოვნები უცვლელია — სამუშაო პირობების გაუმჯობესება და თუკი ეს ასე არ მოხდება, სამართლით გათვალისწინებულ ზომებს მიმართავენ: "ამ ეტაპზე მოვიაზრებთ გაფიცვის უფლების გამოყენებას". სოციალურ მუშაკებს ომბუდსმენთან ერთად სურთ სამოქმედო გეგმის დასახვა.

"ის საკითხები, რომელზეც ჩვენ დიდი ხანია ვსაუბრობთ არის ის, რომ არ არის საკმარისი სოციალური მუშაკების რაოდენობა. ისინი ასრულებენ ისეთი ტიპის სამუშაოს, რომელიც არ შედის მათ მოვალეობაში. მათ არ აქვთ მხარდამჭერი მომსახურებები საკუთარი ბენეფიციარებისთვის. სოციალურ მუშაკებს არ აქვთ ტრანსპორტი, ისინი გადაადგილდებიან საკუთარი ხარჯით, საკუთარი ენთუზიაზმით მუშაობენ, საქმეთა სირთულეებიდან გამომდინარე, სოციალური მუშაკები აცხადებენ, რომ ვერ აუდიან თავიანთი ფიზიკური, ადამიანური, ინტელექტუალური რესურსებით ამ საქმეების გამკლავებას", — განაცხადა ქეთევან ხუციშვილმა.

საინიციატივო ჯგუფის წევრი აცხადებს, რომ სააგენტოსგან მიიღეს დაპირება ცვლილებებზე თუმცა მათთვის გაურკვეველია, როდიდან შეიცვლება მდგომარეობა.

სახალხო დამცველი ნინო ლომჯარიაც მიუთითებს სოციალური მუშაკების არასათანადო სამუშაო პირობებზე. მისი თქმით, აუცილებელია ამ ინსტიტუტის გაძლიერება: "ამასთან დაკავშირებით სახალხო დამცველი ძალიან დიდი ხანია გასცემს რეკომენდაციას".

გაიგე მეტი: სოციალური მუშაკი — პროფესია, რომლის მნიშვნელობასაც სისტემა ვერ ხვდება