ახალგაზრდა იურისტთა ასოციაცია და ტფილისის ჰამქარი თბილისის ბოტანიკური ბაღის ირგვლივ მიმდინარე მოვლენებს ეხმაურებიან და განმარტავენ, რომ ბაღის საკუთრებაში არსებული ტერიტორიის კორექტირების შესახებ გადაწყვეტილება გაუმჭვირვალედ და დაინტერესებული ჯგუფების მონაწილეობის გარეშე მიიღეს. მათი თქმით, გადაწყვეტილების ასეთი ფორმით მიღება საზოგადოების შესაძლებლობას, მონაწილეობა მიიღოს გადაწყვეტილების პროცესში, მნიშვნელოვნად ამცირებს.

ორგანიზაციები ასევე მნიშვნელოვნად მიიჩნევენ, რომ, ვინაიდან კულტურის სამინისტროს 2007 წლის ბრძანების საფუძველზე, აღნიშნულ ბაღს კულტურული მემკვიდრეობის უძრავი ძეგლის სტატუსი მიანიჭეს, ის არის კულტურული მემკვიდრეობის ძეგლი და მასზე ვრცელდება დაცვის ყველა ის მექანიზმი, რომელიც კანონით არის დადგენილი:

"მიუხედავად თბილისის მერიის განცხადებისა, რომ ბოტანიკური ბაღის საკადასტრო საზღვრების კორექტირება კულტურული მემკვიდრეობის ძეგლის არეალისგან დამოუკიდებლად განახორციელეს, თბილისის მერიას არ წარმოუდგენია შესაბამისი დოკუმენტაცია, რომელიც დაადასტურებდა, რომ ბოტანიკური ბაღის საკუთრებაში არსებული ე.წ. დაკორექტირებული ტერიტორია არ განეკუთვნებოდა კულტურული მემკვიდრეობის ძეგლის ნაწილს. შესაბამისად, არსებობს საფუძვლიანი ვარაუდი, რომ საზღვრების კორექტირება კულტურული მემკვიდრეობის დაცვის არეალში განხორციელდა".

გარდა ამისა, საია და ტფილისის ჰამქარი განმარტავენ, რომ უცნობია, ბაღის საკუთრებაში არსებული ფართის კორექტირებასთან დაკავშირებით, ინფორმირებული იყო თუ არა კულტურის სამინისტრო და კულტურული მემკვიდრეობის დაცვის ეროვნული სააგენტო. ამასთან, ორგანიზაციები ამბობენ, რომ აღნიშნული ორი ადმინისიტრაციული ორგანოს შესაძლო მონაწილეობის გარეშე, კულტურული მემკვიდრეობის ძეგლთან დაკავშირებით მიღებული ნებისმიერი გადაწყვეტილება კითხვის ნიშნის ქვეშ ტოვებს აღნიშნული გადაწყვეტილებების კანონიერების საკითხს.

შპს ფინსერვისი XXI-ის 2016 წლის 12 აპრილის მიმართვის საფუძველზე თბილისის ბოტანიკური ბაღის საკადასტრო საზღვრების კორექტირება განახორციელეს, რომლის საფუძველზეც კომპანიამ და ბოტანიკურ ბაღმა ტერიტორიები გაცვალეს.

აღნიშნულთან დაკავშირებით, 26 აპრილს, ნაციონალური მოძრაობის წარმომადგენლებმა ბრიფინგი გამართეს, სადაც განმარტეს, რომ ბიძინა ივანიშვილის კომპანიამ (იგულისხმება ფინსერვისი XXI) თბილისის ბოტანიკური ბაღის ტერიტორიიდან 4 ჰექტარი მიწა უკანონოდ მიითვისა.

მოგვიანებით ენმ-მ საპროტესტო აქციები თბილისის მერიასთანაც გამართა და გარდა ზემოაღნიშნულისა, კრწანისი-შინდისის გზის მშენებლობის შეჩერება და მის ტერიტორიაზე გამოცხადებული აუქციონიც გააპროტესტა. მათი თქმით, აუქციონი უკანანოა და მასში უპირობოდ ბიძინა ივანიშვილი გაიმარჯვებს.

ენმ-ს განმარტებით, იმ შემთხვევაში, თუ აუქციონი არ შეწყდება, პარტია 3 მაისიდან მასშტაბური საპროტესტო აქციების გამართვას აპირებს.