ლანჩხუთის მუნიციპალიტეტის სოფელ ჩიბათის საჯარო სკოლის სამოქალაქო განათლების პედაგოგი ლადო აფხაზავა მასწავლებელთა გლობალური ჯილდოს 10 ფინალისტს შორის დაასახელეს. ფონდის ვებგვერდზე ვლადიმერ აფხაზავასა და მისი აქტივობების შესახებ ვრცელი ინფორმაციაა გამოქვეყნებული, ასევე განხილულია, რაში დახარჯავს გამარჯვების შემთხვევაში მიღებულ დაფინანსებას მასწავლებელი საქართველოდან.

მასწავლებელთა გლობალური ჯილდოს ვებგვერდი ლადო აფხაზავაზე

"ვლადიმერ აფხაზავა საქართველოს ღარიბ რეგიონში ასწავლის, სადაც ეკონომიკური ზეგავლენა საკმაოდ მაღალია. მშობლების უმეტესობა იძულებულები არიან წავიდნენ უცხოეთში სამუშაოდ, რათა ოჯახის წევრებს ფინანსურად დაეხმარონ. შედეგად, ვლადიმერის ბევრი მოსწავლე არ საუზმობს დილით. დამშეული ბავშვების გამო სკოლაში ზოგჯერ სასწრაფო სამედიცინო დახმარებას იძახებენ.

რეგიონში ბავშვთა შრომაც მნიშვნელოვანი პრობლემაა. ლადო აფხაზავამ მისიად დაისახა გაეპროტესტებინა ეს მდგომარეობა. თავიდან, მას არ ეხმარებოდნენ და უპირისპირდებოდნენ. თუმცა, დაჟინებული მცდელობითა და ჟურნალისტების დახმარებით, მან ბევრ აქტუალურ პრობლემაზე იმუშავა. ამ აქტივობების გამო ის 2017 წელს მასწავლებლის ეროვნული ჯილდოს მფლობელიც გახდა.

ვლადიმირის კონტრიბუცია სკოლასა და საზოგადოებაში ამით არ დამთავრებულა. მისმა ადრეულმა მარცხმა და დაბრკოლებებმა, მისცა ენერგია დახმარებოდა სხვებს. მან სასკოლო აქტივობები გააფართოვა, რათა ყველა მოსწავლეებზე ყოფილიყო მორგებული. მან მოიპოვა დაფინანსება კერძო კომპანიებისგან და საწარმოებისგან, ასევე მოიპოვა სხვადასხვა გრანტი, რათა დაეფინანსებინა სოციალურად დაუცველი ოჯახის ბავშვების საგანმანათლებლო რესურსები, საგაზაფხულო ბანაკები და სახელმძღვანელოები.

მან ასევე სახლით უზრუნველყო რვა თინეიჯერი ბიჭი, რომლებიც ოჯახში ძალადობის მსხვერპლები იყვნენ. მან მოიპოვა მხარდაჭერა და დაამტკიცა, რომ მისი სკოლა ღიაა მოსწავლეების აქტივობებისთვისა და მონაწილეობისთვის. ამ მიზნით მან დაიწყო პროგრამა სახელწოდებით "დემოკრატიული რევოლუცია", რომლის მიზანი მოსწავლეთა გააქტიურება, მათი იდეებისა და ინიციატივების რეალიზებაა. შედეგად, კომუნიკაცია სკოლასა და მოსწავლეებს შორის გაღრმავდა. პროგრამა განხორციელდა 14 სხვა სკოლაშიც. ლადომ იმოგზაურა, როგორც ლოკალურად რეგიონში ისე საერთაშორისო დონეზე, რათა სკოლებისთვის კონსულტაციები შეეთავაზებინა.

თუ ვლადიმერ აფხაზავა მასწავლებლების გლობალური ჯილდოს მფლობელი გახდება, ის გეგმავს საქართველოს სხვადასხვა რეგიონში მდებარე ისეთ სკოლებს დაეხმაროს, რომელთაც არ შეუძლიათ თანამედროვე ტექნოლოგიებისა და უცხოენოვანი წიგნების სკოლებში დანერგვა. ის არის მზად პირადად ჩაიტანოს საგანმანათლებლო რესურსები სკოლაში. მოგებული თანხა ასევე მოხმარდება ღარიბი ოჯახების ბავშვებს, რათა შეძლოს სახელმწიფო გრანტის მიღება და სწავლის გაგრძელება. დამატებით, ლადო აფხაზავას რეგიონში არც ერთ სკოლას კაფეტერია არ აქვს. დაფინანსების შემთხვევაში, ლადო აფხაზავა ამ პრობლემის მოგვარების პირობას იძლევა. ლადო აფხაზავა ასევე გეგმავს, რომ თავისი რეგიონის 26 სკოლაში სასათბურე ფერმები განავითაროს".

ვიდეო ლადო აფხაზავას საქმიანობის შესახებ

მასწავლებელთა გლობალური ჯილდო

2019 წლის მასწავლებლის გლობალური ჯილდოს ფინალში ლადო აფხაზავასთან ერთად არიან:

• დებორა გურაფლო - ბრაზილია;
• დეიზი მერტენს - ნიდერლანდები;
• ენდრიუ მოფეტ - დიდი ბრიტანეთი;
• სვარუპ რავა - ინდოეთი;
• მელისა სალგუერო - აშშ;
• მარტინ სალვეტი - არგენტინა;
• იასოდაი სელვაკუმარან - ავსტრალია;
• ჰიდიკაზუ შოტო - იაპონია;
• პიტერ ტუბიში - კენია.

ფინალისტები 179 ქვეყნის 10 000 განაცხადიდან შეირჩნენ. გამარჯვებული დუბაის განათლებისა და უნარების გლობალურ ფორუმზე 2019 წლის 24 მარტს გამოვლინდება.

"მასწავლებლის გლობალური ჯილდო" 1 მილიონი დოლარის ოდენობის ყოველწლიური ჯილდოა, რომელიც გადაეცემა გამორჩეულ მასწავლებელს პროფესიაში განსაკუთრებული წვლილის შეტანისათვის. კამპანიის მიზანია მასწავლებლის პროფესიის პოპულარიზაცია და აღიარება, საუკეთესო მასწავლებლის გამოვლენა და დაფასება. ჯილდო მოქმედებს 2015 წლიდან.