იუსტიციის უმაღლესი საბჭოს არამოსამართლე წევრები ნაზი ჯანეზაშვილი და ანა დოლიძე აცხადებენ, რომ უზენაესი სასამართლოს დაკომპლექტების გადადების გამო საბჭომ სასამართლოს ქვედა ინსტანციებში მოსამართლეთა კონკურსი შეაყოვნა. მათი თქმით, უზენაესის მოსამართლეების არჩევამდე, საბჭოსთვის ხელსაყრელი არ არის რაიონულ (საქალაქო) და სააპელაციო სასამართლოებში მოსამართლეთა დანიშვნა.

დოლიძისა და ჯანეზაშვილის მტკიცებით, ნაცვლად იმისა, რომ საბჭო კონკურსის გზით მოსამართლეთა კორპუსის ახალი კადრებით შევსებაზე ზრუნავდეს, მას შიდა გადააგილებებისა და ე.წ. კლანის გასაძლიერებლად იყენებს. მათი თქმით, კონკურსანტების უმრავლესობა უკვე უვადოდ დანიშნული მოსამართლეა ან უფლებამოსილების ვადის ამოწურვამდე რამდენიმე წელი აქვს დარჩენილი. მათივე თქმით, ისინი მონაწილეობენ ამ კონკურსში რათა ამ გზით გადაინაწილონ თანამდებობები და გავლენები.

როგორც დოლიძე და ჯანეზაშვილი აცხადებენ, იუსტიციის უმაღლესმა საბჭომ მოსამართლეთა ვაკანტურ თანამდებობებზე თვეების წინ გამოცხადებული კონკურსი ხელოვნურად შეაყოვნა და კონკურსი 7 თვეა უშედეგოდ მიმდინარეობს. მათი თქმით, ბოლო ოთხი თვის განმავლობაში საბოლოო ეტაპზე გადასული 78 კანდიდატიდან გასაუბრება 77-ს ჩაუტარდა. დარჩენილ 1 კანდიდატთან კი გასაუბრება არ ჩატარებულა.

მათივე მტკიცებით, ბოლო კანდიდატთან გასაუბრება არ ტარდება რადგან, დასრულებისთანავე კანონით დადგენილი ვადის ათვლა დაიწყება. საბჭოს საერთო ჯამში მხოლოდ 10 სამუშაო დღე აქვს იმისათვის, რომ გასაუბრების შემდგომ მოსამართლეთა ვაკანტური თანამდებობის დასაკავებლად კენჭისყრა ჩაატაროს.