თუ გგონიათ, რომ დიდ ეკრანზე გაბრწყინებისთვის ლამაზი სხეული, სტომატოლოგთან უამრავი ვიზიტის შემდეგ დაყენებული ჰოლივუდის ღიმილი და სულ ცოტა ნიჭი საკმარისია, არ ცდებით, ნამდვილად ასეა.

თუმცა, ისევე როგორც ყველგან, ამერიკული კინო სამყაროშიც არიან მსახიობები, რომლებიც არამხოლოდ საკუთარი გარეგნობითა და ნიჭით, არამედ იმითაც გვაოცებენ, რომ მათგან ბევრი საინტერესოს მოსმენა და სწავლა შეიძლება.

ამის ერთ-ერთი ნათელი მაგალითია ემა უოთსონი, რომელიც ერთი წლის განმავლობაში ოქსფორდის უნივერსიტეტის სტუდენტი იყო, 2014 წელს კი ბრაუნის უნივერსიტეტში ლიტერატურათმცოდნის ბაკალავრის ხარისხი მიიღო. ცოტა ხნის წინ, ჰარი პოტერის ვარსკვლავი გაეროს კეთილი ნების ელჩად დაინიშნა და ყოველთვის საინტერესო სიტყვით გამოდის სხვადასხვა სამიტებსა თუ შეხვედრებზე. აღსანიშნავია ისიც, რომ ის აქტიურად არის ჩართული ქალთა უფლებებისთვის ბრძოლაში და მონაწილეობს კამპანიაში HeForShe.

ნატალი პორტმანის დიდებული კარიერა მას შემდეგ დაიწყო, რაც მან ჰარვარდის უნივერსიტეტი დაამთავრა და ფსიქოლოგის ხარისხი მიიღო. მას ასევე დასრულებულ აქვს ებრაული უნივერსიტეტი იერუსალიმში და საუბრობს ექვს ენაზე. აღსანიშნავია ისიც, რომ მისი სტატიები ორჯერ დაიბეჭდა სამეცნიერო ჟურნალში და როგორც თავად ამბობს, ურჩევნია იყოს ჭკვიანი, ვიდრე კინო ვარსკვლავი.

ყველაზე ცანცარა ჰოლივუდელი ჯეიმს ფრანკო არც მეტი, არც ნაკლები მათემატიკოსია და თანაც კალიფორნიის უნივერსიტეტის კურსდამთავრებული. ამასთანავე მსახიობს გავლილი აქვს - ნიუ-იორკის კინოს ინტიტუტის კურსები, დაამთავრა კოლუმბიის უნივერსიტეტი სადაც ლიტერატურათმცოდნის ხარისხი მიანიჭეს, სამხრეთი კაროლინას უნივერსიტეტში პოეზიის კურსებს ესწრებოდა, ხოლო იელის უნივერსიტეტში მან ინგლისური ენის სპეციალისტის ხარისხი მიიღო. ჯერჯერობით ბოლო მის უნივერსიტეტოგრაფიაში სამხრეთ კალიფორნიის უნივერსიტეტია, სადაც სცენარის წერის კურსები დაამთავრა.

თუ ოდესმე სინდი კროუფორდთან შეხვედრა მოგიწევთ, არც კი გაბედოთ იმის თქმა, რომ მოდელებს ჭკუა არ აქვთ. ლეგენდარული მოდელი წლების წინ ქიმიურ ტექნოლოგიებს ეუფლებოდა ილინოიში, ჩრდილო-დასავლეთის უნივერსიტეტში.

ყველასათვის საყვარელი და კარგად ნაცნობი ლიზა კუდროუ, მეგობრებისთვის კი უბრალოდ ფიბი ბუფე არც მეტი, არც ნაკლები, პროფესიით ბიოლოგია, თანაც სპეციალური განხრით - იკვლევს თავის ტკივილის მიზეზებს. დიახ, ორი წელი ამავე პროფესიით მუშაობდა კიდეც.

ოსკარის სამგზის ნომინანტი, ედვარდ ნორტონი, რომელსაც იელის უნივერსიტეტში ისტორიის ფაკულტეტი აქვს დამთავრებული, კინო კარიერის დაწყებამდე ერთ-ერთ არაკომერციულ კომპანიაში ანალიტიკოსად მუშაობდა.

და-ძმა ჯეიკ და მეგი ჯილენჰოლები კოლუმბიის უნივერსიტეტის კურსდამთავრებულები არიან. აღსანიშნავია, "კუზიანი მთის" ვარსკვლავის, ჯეიკის სპეციალობა, ის პროფესიით რელიგიათმცოდნეა.

ოსკარის მფლობელმა ჯინა დევისმა დრამის ფაკულტეტი ბოსტონის უნივერსიტეტში დაამთავრა, აღსანიშნავია, რომ მისი მსგავსი მაღალი IQ-ს მონაცემები ამერიკელების მხოლოდ 2%-ს აქვს. 2009 წელს დევისმა დოქტორის წოდება მიიღო ბეითსის უნივერსიტეტში და კითხულობს ლექციებს თემაზე გენდერი და მედია.

გეტყვით, რომ, რა თქმა უნდა, ეს არ არის ნიჭიერი და ამავდროულად განათლებული მსახიობების სრული ჩამონათვალი. საბედნიეროდ ისინი მრავლად არიან - არა მხოლოდ ამერიკულ, არამედ მსოფლიო კინემატოგრაფში.