სამეფო კარის თამაშებში მატებაა, ჯიმ ბროუდბენტის შემდეგ HBO-ს სერიალს ლეგენდარული ინგლისელ-ამერიკელი მსახიობი, ოსკარის სამგზის, ემის თვრამეტგზის ნომინანტი, ოქროს გლობუსის ექვსგზის ლაურეატი და ამერიკის უმაღლესი თეატრალური პრემიის, ტონის რეკორდული, ხუთგზის მფლობელი ანჯელა ლენსბერი შეუერთდა.

როგორც წყარო იტყობინება, ლენსბერი სერიალის ორ ეპიზოდში მიიღებს მონაწილეობას, თუმცა უცნობია კონკრეტულად რა როლს შეასრულებს მსახიობი.

ანჯელა ლენსბერი წელს 91 წლის იუბილეს აღნიშნავს და თამამად შეგვიძლია ვთქვათ, რომ მიუხედავად მისი არც თუ ისე პატარა ასაკისა, მისი სამსახიობო კარიერა არც ერთი წუთით არ შეფერხებულა. ის აქტიურია როგორც კინოში, ასევე თეატრის სცენასა და ტელევიზიაში.

მსახიობი ცნობილია ჯესიკა ფლეტჩერის როლით კრიმინალურ დრამაში Murder, She Wrote. ასევე ფილმებით - გრძელი ცხელი ზაფხული, აირის ნათება, რაღაც ყველასთვის, ლედი ქრება და მრავალი სხვა.

და თუ მაინც ვერ გაიხსენებთ ვერც მის სახელსა და გვარს და ვერც მის სახეს, მაშინ აუცილებლად ამოიცნობთ მისი ხმას მისის პოტსის პერსონაჟში - ანიმაციური ფილმიდან ლამაზმანი და ურჩხული.

სამეფო კარის თამაშების მეშვიდე სეზონის პრემიერა, რომელსაც ჩრდილოეთ ირლანდიაში, ესპანეთსა და ისლანდიაში გადაიღებენ 2017 წელს გაიმართება და ის წინამორბედებისგან განსხვავებით შვიდი ეპიზოდისგან შედგება.