ოსკარის მფლობელი ინგლისელი თეატრის, კინოსა და ტელევიზიის მსახიობი ჯიმ ბროუდბენტი სერიალ სამეფო კარის თამაშების მეშვიდე სეზონში მიიღებს მონაწილეობას.

მიუხედავად იმისა, რომ მსახიობს არაერთი საინტერესო პერსონაჟი აქვს შექმნილი, მათ შორის ისეთ ფილმებში, როგორებიც არის - მულენ რუჟი, აირისი, ნარნიას ქრონიკები, რკინის ლედი, ქალი ფურგონში და სხვა, ბევრისთვის ის მაინც პროფესორ ჰორაციუს სლაგჰორნთან ასოცირდება ჯოან როულინგის პოტერიადას ეკრანიზაციებიდან.

როგორც ამბობენ ბროუდბენტის პერსონაჟი სამეფო კარის თამაშების ახალ სეზონში ძალიან მნიშვნელოვან როლს შეასრულებს, თუმცა, რა თქმა უნდა, ჯერ არ ხმაურდება თუ კერძოდ ვის როლს ითამაშებს.

ჯიმ ბროუდბენტი ჰარი პოტერის პირველი მსახიობი არ არის, რომელიც სამეფო კარის თამაშებში გამოჩნდება. მიშენ ფეირლი, რომელიც პოტერიადაში ჰერმიონ გრეინჯერის დედის როლს ასრულებს, HBO-ს სერიალში კეტლინ სტარკის როლში მოგვევლინა.

ფოტო: youthconnect

სერიალის მეშვიდე სეზონის პრემიერა, რომელსაც ჩრდილოეთ ირლანდიაში, ესპანეთსა და ისლანდიაში გადაიღებენ 2017 წელს გაიმართება და ის წინამორბედებისგან განსხვავებით შვიდი ეპიზოდისგან შედგება.