პლატფორმა არა-ფობიას! მოუწოდებს პროკურატურას, რომ უფლებადამცველის, ვიტალი საფაროვის მკვლელობის საქმე ჯგუფურ დანაშაულად გადაკვალიფიცირდეს .

"მომხდარი ფაქტი კიდევ ერთხელ ადასტურებს საზოგადოებაში სიძულვილის მოტივით ჩადენილი დანაშაულის საფრთხის მზარდ ტენდენციას, რომლის საპასუხოდაც, სახელმწიფოს შესაბამისი უწყებები სრულყოფილად და ეფექტიანად ვერ უზრუნველყოფენ პრევენციული მექანიზმების შემუშავებას, მსგავსი დანაშაულების მოტივის სათანადო იდენტიფიცირებასა და დამნაშავე პირების ადეკვატურ დასჯას", — ნათქვამია ერთიან განცხადებაში.

უფლებადამცველი ვიტალი საფაროვი 2018 წლის 30 სექტემბერს მოკლეს. არასამთავრობო ორგანიზაციები თავიდანვე აცხადებდნენ, რომ მისი მკვლელობის საფუძველი ქსენოფობიური მოტივი იყო. ადამიანის უფლებათა ცენტრისა და ჩართულობისა და განვითარების ცენტრში კი ამბობდნენ, რომ საფაროვის მკვლელობაში ბრალდებულები ე.წ. ნეონაცისტური დაჯგუფების წევრები არიან.

თავდაპირველად გამოძიება განზრახ მკვლელობისა და დანაშაულის შეუტყობინებლობის, სისხლის სამართლის კოდექსის 108-ე და 376-ე მუხლებით მიმდინარეობდა. შემგდომში კი პროკურატურამ ბრალი დაამძიმა. საქმე რასობრივი, რელიგიური, ეროვნული ან ეთნიკური შეუწყნარებლობის გამო განზრახ მკვლელობის ჩადენის მუხლით გადაკვალიფიცირდა (109 მუხლის მეორე ნაწილის "დ" ქვეპუნქტი).

არა ფობიას! პლატფორმის წევრი ორგანიზაციები ამბობენ, რომ დანაშაულის შეუტყობინებლობისთვის დაკავებული მკვლელობაში უშუალოდ მონაწილეობდა, რისი დამადასტურებელი მტკიცებულებებიც არსებობს. ისინი ითხოვენ, რომ ბრალი განზრახ მკვლელობაში თანამონაწილეობად გადაკვალიფიცირდეს:

"ის ცემდა მსხვერპლს და ურტყამდა კასტეტს, რითაც გამოიხატება დანაშაულში მისი აქტიური მონაწილეობა. ადვოკატების ხელთ არსებული ინფორმაციით, ეს ფაქტი დასტურდება, როგორც დანაშაულის თვითმხილველ მოწმეთა ჩვენებებით, ასევე სათვალთვალო ვიდეოკამერებით გადაღებული კადრებით, საქმეში არსებული დანაშაულის ორი იარაღით და მსხვერპლისთვის სხეულზე მიყენებული ჭრილობებით".

როგორც პლატფორმა აცხადებს, რომ ვიტალი საფაროვის საქმეზე სამართლიანი მართლმსაჯულების განხორციელება მნიშვნელოვანია მსგავსი დანაშაულების პრევენციის, სამართალდამცავი ორგანოების მიმართ ნდობის შენარჩუნებისა და თანასწორობის და დემოკრატიის იდეების დაცვისთვის.

განცხადებას ხელს აწერს 12 ორგანიზაცია:

  • ადამიანის უფლებათა ცენტრი (HRC);
  • საქართველოს დემოკრატიული ინიციატივა (GDI);
  • მედიის განვითარების ფონდი (MDF);
  • ტოლერანტობის და მრავალფეროვნების ინსტიტუტი (TDI);
  • საქართველოს ახალგაზრდა იურისტთა ასოციაცია (GYLA);
  • კონსტიტუციის 42-ე მუხლი;
  • სამართლიანი არჩევნებისა და დემოკრატიის საერთაშორისო საზოგადოება (ISFED);
  • დემოკრატიისა და უსაფრთხო განვითარების ინსტიტუტი (IDSD);
  • საფარი;
  • ადამიანის უფლებების სწავლებისა და მონიტორინგის ცენტრი (EMC);
  • თანასწორობის მოძრაობა;
  • საქართველოს რეფორმების ასოციაცია (GRASS);