ადამიანის უფლებების სწავლებისა და მონიტორინგის ცენტრი (EMC) კვლევას აქვეყნებს - პოლიტიკური ნეიტრალიტეტი პოლიციის სისტემაში. საპოლიციო პრაქტიკაზე დაკვირვება მოიცავდა 2015 წლის ივლისიდან 2016 წლის ივნისამდე პერიოდს.

კვლევის ერთ-ერთ ძირითად მიგნებად აღნიშნულია, რომ საკვლევ პერიოდში, განსხვავებით პოლიტიკური ჯგუფებისგან, პოლიცია დემონსტრაციულად რეპრესიული ჩანდა სამოქალაქო აქტივისტებისა და, ზოგადად, აქტივისტთა ჯგუფების მიმართ. ავტორები მიუთითებენ, რომ ეს ხდებოდა განსაკუთრებით იმ დროს, როდესაც აქტივისტები ხელისუფლების პოლიტიკას ან და ყოფილი პრემიერ მინისტრის, ბიძინა ივანიშვილის ინტერესებთან დაკავშირებულ მოვლენებს აპროტესტებდნენ.

ასევე, კვლევაში უარყოფით ტენდენციად აფასებენ პოლიციის ინერტულობას ცალკეული პირების თუ კერძო ჯგუფების მხრიდან, პროვოცირებული/ინიცირებული და განხორციელებული ძალადობების აღკვეთისას, მათ შორის, პოლიტიკური ოპოზიციის წინააღმდეგ:

"მიუხედავად იმისა, რომ უშუალოდ სამართალდამცავების მხრიდან პოლიტიკური ჯგუფების (პოლიტიკური ოპოზიციის) მიმართ პირდაპირი ძალადობის ტენდენცია არ გამოკვეთილა, კერძო და ლოკალური ძალადობის ფაქტებზე არასაკმარისი რეაგირება და მათი შემდგომი გავრცელება მნიშვნელოვნად აზიანებდა პოლიტიკურ გარემოს და პროცესებს ქვეყანაში და ქმნიდა ერთგვარი სახეცვლილი "პოლიტიკური ძალადობის" ელფერს".

როგორც კვლევის ფარგლებში ათი საქმის ანალიზმა აჩვენა, ასეთი საპოლიციო ინსტრუმენტებია:

  • ნარკოტესტირებაზე პირების თვითნებური და დაუსაბუთებელი გადაყვანა;
  • ადმინისტრაციული დაკავების დაბალი სტანდარტებით გამოყენება;
  • წვრილმანი ხულიგნობისა და დაუმორჩილებლობის ფართოდ განმარტება და სხვა;

კვლევის ავტორები წერენ, რომ მათ ძირითად მიგნებას წარმოადგენს ხარვეზიანი საკადრო პოლიტიკა, რაც გამოიხატება შინაგან საქმეთა მინისტრის ფაქტობრივად შეუზღუდავ უფლებამოსილებაში, საკადრო საკითხების გადაჭრისას, რითაც იქმნება პოლიტიკური თანამდებობის პირის მხრიდან ამ ბერკეტებით მანიპულირების შესაძლებლობა:

"დაუხვეწავი და გაუმჭვირვალე საკადრო პოლიტიკა, რომელიც ასევე ემყარება ბუნდოვან ნორმებს და სადაც ასევე დიდია მინისტრის კომპეტენცია, ნოყიერ ნიადაგს ამზადებს პოლიციელებზე ზეგავლენის მოსახდენად".

კვლევის მიხედვით დაადგინეს, რომ პრობლემურია შიდა დისციპლინირების მექანიზმი, შსს-ს გენერალური ინსპექცია, არასაკმარისად დამოუკიდებელია:

"პრობლემურია შს სამინისტროს მოსამსახურეთა სამსახურში მიღების, თანამდებობრივი დაწინაურებისა და გადაყვანის მექანიზმის, პრემირების სისტემის არასაკმარისი საკანონმდებლო რეგლამენტაცია და ამ პროცესში მინისტრის ფართო უფლებამოსილება".

კვლევა ადამიანის უფლებების სწავლებისა და მონიტორინგის ცენტრმა სოციალური კვლევისა და ანალიზის ინსტიტუტთან თანამშრომლობითა და ნიდერლანდების სამეფოს საელჩოს პროგრამა მატრას ფინანსური მხარდაჭერით განახორციელა.