თბილისის მერია განიხილავს, რომ ახალაშენებული კორპუსის ექსპლუატაციაში მიღებამდე მასში ცხოვრების უფლება მოქალაქეებს შეეზღუდოთ. ამ საკითხზე თბილისის მერის პირველმა მოადგილემ, ირაკლი ხმალაძემ ისაუბრა. მის კომენტარს უწყების პრესსამსახური ავრცელებს.

"ვმსჯელობთ იმაზე, რომ დავაბრუნოთ რეგულაცია, რომელიც ითვალისწინებს ექსპლუატაციაში მიღებამდე შესახლების შეზღუდვას, რაც საკმაოდ მნიშვნელოვანია და ზოგადად, ექსპლუატაციაში მიღებაც მიებას გაზისა და ელექტროსისტემის გამართულობას, ანუ კორპუსი არ ჩაიბაროს მერიამ, სანამ შესაბამისი სადისტრიბუციო კომპანიები არ დაადასტურებენ, რომ იქ სათანადოდ არის უზრუნველყოფილი ქსელის გაყვანა და მისი მონტაჟი", — განაცხადა ირაკლი ხმალაძემ.

მისივე თქმით, დაგეგმილია, რომ საკანონმდებლო დონეზე სავალდებულო გახდეს სახლში გაზის გაჟოვნის აღმომჩენი დეტექტორის დაყენება.

"საუბარი იყო აკრედიტირებული ორგანოების შექმნაზე იმისთვის, რომ ზოგადად, სახლში გაზის სისტემის უსაფრთხოება კვალიფიციურმა პირებმა და კვალიფიციურმა კომპანიებმა შეამოწმონ. ამით ჩვენ მივაღწევთ გარკვეულწილად უსაფრთხოების სხვა სტანდარტს", — აღნიშნა მან.

16 იანვარს, საღამოს თბილისში, დიდ დიღომში, ავთანდილის ქუჩაზე საცხოვრებელი კორპუსის მეექვსე სართული, სავარაუდოდ, გაზის გაჟონვის შედეგად აფეთქდა. შემთხვევის შედეგად გარდაიცვალა ოთხი ადამიანი, მათ შორის 4 წლის ბავშვია. სხვადასხვა სახის დაზიანება მიიღო რვა ადამიანმა.

აფეთქების დღეს მაცხოვრებლებმა ყაზტრანსგაზის ჯგუფი ორჯერ გამოიძახეს და მათ საფრთხე ვერ აღმოაჩინეს. მომხდარზე შსს-მ ყაზტრანსგაზის ორი თანამშრომელი დააკავა. ისინი ბრალს არ აღიარებენ და აცხადებენ, რომ კორპუსი შეამოწმეს და აპარატმა გაჟონვა არ დააფიქსირა.