შესწორება: ნიუსის თავდაპირველ ვერსიაში აღნიშნული იყო, რომ გეგა გეგეშიძე სასამართლო დარბაზიდან გირაოთი გაათავისუფლეს. ბრალდებულს მას შემდეგ გამოუშვებენ, რაც გირაოს გადაიხდის.

ძალადობის ბრალდებით დაკავებულ ჭიდაობის ფედერაციის პრეზიდენტს, გეგა გეგეშიძეს, აღკვეთის ღონისძიების სახით, 5 000-ლარიანი გირაო შეეფარდა. აღნიშნული შუამდგომლობა ბრალდების მხარემ დააყენა. გირაოს გარდა პროკურატურა გეგა გეგეშიძისთვის დამატებით ვალდებულებასაც ითხოვდა, რაც ფედერაციის პრეზიდენტის პსოტის დატოვებას გულისხმობდა. დაცვის მხარე დაეთანხმა ბრალდების მხარის შუამდგომლობას მხოლოდ გირაოს ნაწილში, ხოლო დამატებითი ვალდებულების ნაწილი არ გაიზიარა.

მოსამართლემ ბრალდები მხარის მიერ მხოლოდ გირაოს შეფარდების შესახებ დაყენებული შუამდგომლობა დააკმაყოფილა და ბრალდებულს დამატებითი ვალდებულება არ განუსაზღვრა.

წინასასამართლო სხდომა გეგა გეგეშიძის საქმეზე 12 მარტს ჩაინიშნა.

ჭიდაობის ფედერაციის პრეზიდენტი თამაზ (გეგა) გეგეშიძე, სპორტის სასახლეში, სპორტსმენ ზურაბ დათუნაშვილის მიმართ განხორციელებული ძალადობის ბრალდებით 22 იანვარს, საღამოს დააკავეს. გამოძიების ვერსიით, 11 იანვარს, სპორტის სასახლეში მომხდარი დაპირისპირებისას, თამაზ გეგეშიძემ ფიზიკური შეურაცხყოფა მიაყენა სპორტსმენ ზურაბ დათუნაშვილს. მოჭიდავეების ნაწილი ფედერაციის პრეზიდენტის, გეგა გეგეშიძის დაკავებას აპროტესტებს. ისინი გეგეშიძის გათავისუფლებას ითხოვენ და ამბობენ, რომ სპორტის სასახლეში მომხდარი დაპირისპირება ინციდენტი იყო, რომელიც ფედერაციაშივე უნდა დასრულებულიყო.

11 იანვარს ბერძნულ-რომაულ ჭიდაობაში საქართველოს ჩემპიონატის ფინალის დროს ინციდენტი მოხდა. რუსთავი 2-ის მიერ გავრცელებულ კადრებში ჩანს, რომ მოჭიდავე ზურაბ დათუნაშვილს მუშტი სახეში საქართველოს ჭიდაობის ეროვნული ფედერაციის პრეზიდენტმა თამაზ (გეგა) გეგეშიძემ ჩაარტყა. ვიდეომასალის მიხედვით, ფედერაციის პრეზიდენტში ხელში რაღაც ნივთი უჭირავს, რომელსაც სპორტსმენის მიმართულებით იქნევს და შემდეგ მუშტს არტყამს. ამ ფაქტის შემდეგ დათუნაშვილს სახიდან სისხლი მოსდის.

ამავე თემაზე: