უნგრეთის პარლამენტმა დაამტკიცა ეროვნული აქტივების დაბრუნების სააგენტოს შექმნა, რომელსაც კორუფციასთან ბრძოლის ფართო უფლებამოსილება ექნება. ახალი უწყება გააერთიანებს პროკურატურის, პოლიციისა და ფინანსური გამომძიებლების ფუნქციებს.

როგორც Bloomberg წერს, სააგენტოს მთავარი ამოცანა იქნება სახელმწიფოსთვის იმ ქონებისა და სახსრების დაბრუნება, რომლებიც, პირველ რიგში, ვიქტორ ორბანის 16-წლიანი მმართველობის პერიოდში იქნა მითვისებული.

ეროვნული აქტივების დაბრუნების სააგენტოს შექმნას პარლამენტმა სამშაბათს გამართულ კენჭისყრაზე დაუჭირა მხარი. ეს პრემიერმინისტრ პეტერ მადიარის ერთ-ერთი მთავარი ანტიკორუფციული წინასაარჩევნო დაპირების შესრულებაა, რომელმაც აპრილის არჩევნებში დამაჯერებელი გამარჯვება მოიპოვა.

ახალი სააგენტო მთავრობის ძალისხმევის მნიშვნელოვანი ნაწილი იქნება, რომელიც ორბანის მმართველობის პერიოდში თანამდებობის პირების შესაძლო დანაშაულებზე პასუხისმგებლობის დაკისრებას ისახავს მიზნად. ამ წლებში Transparency International-ის კორუფციის აღქმის ინდექსში უნგრეთი ევროკავშირის წევრ ქვეყნებს შორის ბოლო ადგილზე აღმოჩნდა, რის გამოც ევროკავშირმა კორუფციის რისკების გამო ქვეყნისთვის მილიარდობით ევროს დაფინანსება შეაჩერა.

სააგენტოს ერთ-ერთი ყველაზე ფართო უფლებამოსილება იქნება:

  • კორუფციული საქმეების სხვა უწყებებიდან საკუთარ წარმოებაში გადატანა;
    კონფიდენციალურ ფინანსურ მონაცემებზე წვდომა;
  • გამოძიებისთვის ხელის შეშლის შემთხვევაში 5 მილიარდ ფორინტამდე (დაახლოებით 16 მილიონი დოლარი) ჯარიმის დაკისრება;
  • ამასთან, სააგენტოს ექნება უფლება გამოიძიოს დანაშაულები, წარუდგინოს ბრალი ეჭვმიტანილებს, აქტივების დასაბრუნებლად სამოქალაქო სარჩელები შეიტანოს და დროებით მართვაშიც კი გადაიყვანოს კომპანიები, რომლებიც ეჭვმიტანილები არიან უკანონოდ მოპოვებული სახელმწიფო ქონების ფლობაში.

Bloomberg აღნიშნავს, რომ ნაციონალისტი ლიდერის, ვიქტორ ორბანის, მმართველობის ბოლო ათწლეულის განმავლობაში მისი მოკავშირეების მიერ შექმნილი არაერთი ბიზნესიმპერია პრაქტიკულად ნულიდან ჩამოყალიბდა. მოგვიანებით ისინი უნგრეთის უმსხვილეს კომპანიებად იქცნენ სხვადასხვა სექტორში — საბანკო სფეროდან და ენერგეტიკიდან დაწყებული, მშენებლობითა და ტურიზმით დამთავრებული. თავის მხრივ, პრემიერმინისტრმა პეტერ მადიარმა განაცხადა, რომ მისი მთავრობის მცდელობა, უნგრეთი ორბანის გავლენისგან გაათავისუფლოს, ჰგავს იმ ბრძოლას, რომელიც იტალიამ მაფიის წინააღმდეგ აწარმოვა.