ოთხმა ქალმა ოსკაროსანი მსახიობი და ჯგუფ Thirty Seconds to Mars-ის მომღერალი, ჯარედ ლეტო, სექსუალურ ძალადობაში დაადანაშაულა. მათი მტკიცებით, ლეტომ დანაშაულები მაშინ ჩაიდინა, როდესაც ისინი თინეიჯერები იყვნენ.

ერთ-ერთი ქალის განცხადებით, 17 წლის ასაკში იგი მოტელის სააბაზანოში სექსუალური ძალადობის მსხვერპლი გახდა. მეორეს თქმით კი, ჯარედ ლეტო მას სექსუალური ძალადობით მაშინ დაემუქრა, როდესაც 19 წლის იყო და სასტუმროს ნომერში მსახიობთან სრულიად მოულოდნელად მარტო აღმოჩნდა.

მესამე ქალი იხსენებს კალიფორნიაში ვარსკვლავთან დამყარებულ სქესობრივ კავშირს 17 წლის ასაკში, რაც იურიდიულად არასრულწლოვანის გაუპატიურებად კვალიფიცირდება. ქალის განცხადებით, როდესაც მან ახსენა, რომ აღნიშნულ შტატში სქესობრივი კავშირისთვის თანხმობის კანონიერი ასაკი 18 წელია, ლეტომ ეს ფაქტი სრულიად უგულებელყო.

მეოთხე ქალის მტკიცებით, ლეტოს მხრიდან ფსიქოლოგიური ზეწოლის მსხვერპლი იყო. მისი თქმით, მსახიობი ბოროტად იყენებდა საკუთარ ვარსკვლავურ სტატუსს და 16 წლის გოგოსთან სისტემატურად ახორციელებდა სექსუალური შინაარსის სატელეფონო ზარებს და სქესობრივ კავშირსაც სთავაზობდა.

ფოტო: Getty

BBC-ის დოკუმენტური ფილმში, სახელად ჯარედ ლეტო: ჰოლივუდის ბნელი საიდუმლო, 10-მა ქალმა ისაუბრა. მათგან ცხრამ საკუთარი ისტორია საჯაროდ პირველად გააჟღერა. ქალები აღნიშნავენ, რომ ლეტოს 2002 წლიდან 2016 წლამდე პერიოდში შეხვდნენ. ამ პერიოდში მსახიობი 30-დან 40 წლამდე ასაკის იყო, ახლა კი ის 54 წლისაა.

BBC-ის მიხედვით, რამდენიმე ქალის ისტორია მათ მეგობრებსა და ოჯახის წევრებთან გადაამოწმეს. ზოგიერთ შემთხვევაში, წარმოდგენილია ფოტოები და შეტყობინებებიც, რომლებიც ქალების მონათხრობს ადასტურებს. დოკუმენტურ ფილმში ასევე საუბრობს ორი კაცი, რომლებიც წლების განმავლობაში ლეტოს მუსიკალურ ჯგუფთან მუშაობდნენ. ფილმში ისაუბრეს იმაზეც, თუ რაოდენ უხერხულად გრძნობდა თავს პერსონალი თინეიჯერ გოგოებთან მსახიობის მსგავსი დამოკიდებულების გამო. მათი თქმით, ის ხშირად იწვევდა გოგოებს კულისებში, საკუთარ გასახდელში ან იმ სახლში, სადაც მუსიკას წერდა.

ჯარედ ლეტოს BBC-ის მიერ გავრცელებულ ბრალდებებზე პასუხი ამ დრომდე არ გაუცია.