26 წლის რუსმა მსახიობმა, ალექსეი იარმუშჩიკი, რომელიც მსახიობ სერგეი ბეზრუკოვის ხელმძღვანელობით მოქმედ თეატრში მუშაობდა, 28 ივლისის დილით Instagram-ზე ვიდეომიმართვა გამოაქვეყნა, რომელშიც რუსეთის პრეზიდენტს, ვლადიმირ პუტინი, მიმართა.

მან განაცხადა, რომ პუტინი მისი პრეზიდენტი არ არის, ხოლო ყირიმი — მათი, რუსების არაა.

სტატიის გამოქვეყნების მომენტისთვის ვიდეოს მილიონზე მეტი ნახვა და 30 ათასზე მეტი მოწონება ჰქონდა.

"მე ალექსეი ვარ, თეატრისა და კინოს მსახიობი. წელიწად-ნახევარი ბეზრუკოვის თეატრში ვმუშაობდი, სერიალშიც მთავარ როლს ვასრულებდი. მიმაჩნია, რომ ნიჭიერი მსახიობი ვარ და ეს ჩემს პროფესიაშიც ბევრმა იცის.

ყოველ დღე, ყოველ ღამე, ჩემს გონებაში თქვენ გელაპარაკებით. ვერც ამჯერად დავიძინე. დილის ოთხის ნახევარია და აღარ ვიცი, რა გავაკეთო. მიშველეთ... ყველა, ვინც ამ ვიდეოს უყურებს, მიხვდება, რაზეც ვლაპარაკობ. თუ მთელი ამ ხნის განმავლობაში ჩუმად ვიყავი, ახლა ვამბობ იმას, რასაც ვფიქრობ.

არ მინდა, რომ თქვენ ჩემი პრეზიდენტი იყოთ. არასოდეს. 25 წლის ვარ და ჩემი თაობიდან არც ერთ ადამიანს არ ვიცნობ, რომელსაც თქვენი არ ეშინოდეს ან სურდეს, რომ მისი პრეზიდენტი იყოთ. შამანია ყველას წინააღმდეგ. მხოლოდ ის დგას ყველა "უცხოეთის აგენტის" წინააღმდეგ.

არ მინდა, რომ ჩემი პრეზიდენტი იყოთ. დაითხოვეთ მთელი მთავრობა. არ მინდა თქვენი ტელევიზიის ყურება. მინდა ჩემს მუსიკას ვუსმინო. არ მინდა VK-ით სარგებლობა, მინდა Instagram-ი გამოვიყენო, რადგან უკეთესია.

დიახ, მე ჯენზი ვარ. არჩევნებზე იშვიათად დავდიოდი და პოლიტიკით თითქმის არასდროს დავინტერესებულვარ. მაგრამ 14 წლის რომ ვიყავი, ინგლისურის მასწავლებელმა მითხრა, რომ ყირიმის გამო საუკეთესო მეგობარს გადაეკიდა.

მე არ მიმაჩნია, რომ ყირიმი ჩვენია. ეს არ არის რაიმე განსაკუთრებული ფრაზა. ჩემი თანატოლებიდან ასე არავინ ფიქრობს. დღეს ჩემს Instagram-ის ლენტაში ყველა ან ქვეყნიდან მიდის, ან შოკშია, ან ამ თემაზე საერთოდ არ ლაპარაკობს.
არ ვიცი, სად არიან ადამიანები, რომლებსაც თქვენ, როგორც პრეზიდენტი უყვარხართ და პატივს გცემენ.

თქვენ ჩემი პრეზიდენტი არ ხართ. მხოლოდ ამის თქმა მინდოდა. მშვიდობის ღამე", — თქვა ახალგაზრდა მსახიობმა. თუმცა ამის შემდეგ კიდევ 2 ვიდეო ჩაწერა, სადაც თავისი სიტყვები ნაწილობრივ უარყო და ისიც თქვა, რომ "ესაუბრა დედას, რომელმაც უთხრა, რომ ბევრ რამეში ცდებოდა და პუტინმა ქვეყნისთვის ბევრი გააკეთა.

გამოცემა "ოსტოროჟნო ნოვისტის" ჟურნალისტის კითხვაზე, ეშინია თუ არა შესაძლო შედეგების, იარმუშჩიკმა უპასუხა, რომ "რა თქმა უნდა, ეშინია". მისივე თქმით, ვიდეოს ჩაწერის ერთ-ერთი მიზეზი რუსეთში ახალი მობილიზაციის შესახებ გავრცელებული ხმები იყო.

"ლაპარაკობენ, რომ საზღვრებს, როგორც უკრაინაში, ჩაკეტავენ და ქვეყნიდან გასვლას ვეღარ შევძლებ. ახალგაზრდა კაცისთვის ეს ერთ-ერთი ყველაზე ძლიერი შფოთვის მიზეზია", — განაცხადა მან.

როგორც Meduza წერს, ალექსეი იარმუშჩიკმა 2023 წელს დაამთავრა კონსტანტინ რაიკინის უმაღლესი სასცენო ხელოვნების სკოლა, რის შემდეგაც მუშაობა დაიწყო მოსკოვის გუბერნიის დრამატულ თეატრში, რომლის სამხატვრო ხელმძღვანელიც სერგეი ბეზრუკოვია. 2026 წლის ივნისში იარმუშჩიკი თეატრიდან წამოვიდა. მისი თქმით, მიზეზი დაბალი ხელფასი იყო. ამასთან, ამტკიცებდა, რომ თეატრში მსახიობებს "საკუთრებად აღიქვამენ, ხშირად არღვევენ მათ ფსიქოლოგიურ საზღვრებს და ღირსებას ულახავენ".