არიანა გრანდემ ანონიმური ჰაკერების წინააღმდეგ სარჩელი შეიტანა. მომღერლის განცხადებით, ჰაკერებმა მოწყობილობებზე ფარული წვდომა მოიპოვეს, რასაც გამოუქვეყნებელი სიმღერების, ასევე, ჩამწერი სტუდიებიდან და მუსიკალური კლიპებიდან კადრების გავრცელება მოჰყვა.

სარჩელი, რომელიც ლოს-ანჯელესის სასამართლოში ორშაბათს შევიდა, უცნობ პირთა ჯგუფს ადანაშაულებს. მათ ბრალად ედებათ თაღლითობა და ჰაკერული სქემების გამოყენება, რამაც გამოუქვეყნებელი მასალის უკანონო ქურდობა, გავრცელება და ექსპლუატაცია გამოიწვია.

გრანდეს იურიდიული გუნდი უკანონო ქმედებების სქემას აღწერს, რომლის მიხედვითაც ჰაკერები მიზანში იღებდნენ იმ ფოტოგრაფებისა და პროდიუსერების პირად ციფრულ ანგარიშებს, რომლებიც მომღერალთან მჭიდროდ თანამშრომლობდნენ, შემდგომში კი ამ გზით მოპოვებულ მონაცემებსა და კონტენტს ყიდდნენ.

მომღერალი უცნობ პირებს უჩივის, რათა არაკეთილსინდისიერი ადამიანების ვინაობა გამოავლინოს და პირად სივრცეში უხეში ჩარევის გამო პასუხი აგებინოს. აღსანიშნავია, რომ 2023 წელს ჰაკერებმა არიანა გრანდეს 45 გამოუქვეყნებელი სიმღერა მოიპოვეს და საჯაროდ გაავრცელეს. გარდა ამისა, სარჩელის თანახმად, 2024 წელს ჰაკერებმა ფოტოგრაფის იდენტობა მიითვისეს და შესაბამისი Gmail-ის ანგარიში შექმნეს, რათა მისი სახელით მომღერლის გამოუქვეყნებელი ფოტოები მოეპოვებინათ.