ტომ ჰოლანდი ადამიანი ობობას როლში ბრუნდება. Spider-Man: Brand New Day კინოთეატრებში 31 ივლისს გამოვა და Spider-Man: No Way Home-ის მოვლენებიდან ოთხი წლის შემდეგ გააგრძელებს პიტერ პარკერის ისტორიას.

თითქმის ხუთი წელი გავიდა მას შემდეგ, რაც მაყურებელმა ტომ ჰოლანდის ადამიანი ობობა ბოლოს დიდ ეკრანზე იხილა. ამ ხნის განმავლობაში პიტერის ცხოვრება მთლიანად შეიცვალა — ახლა ის მარტოა, მთელ დროს ნიუ-იორკის დაცვას უთმობს და მისი არსებობა აღარავის ახსოვს.

სანამ ახალ ფილმს ნახავთ, გავიხსენოთ, როგორ დასრულდა პიტერ პარკერის წინა თავგადასავალი და რომელი პერსონაჟები დაბრუნდებიან Spider-Man:Brand New Day-ში.

როგორ დასრულდა Spider-Man: No Way Home?

Spider-Man: Far From Home-ის ბოლოს მისტერიომ პიტერ პარკერის საიდუმლო ვინაობა გაამხილა და მთელმა მსოფლიომ გაიგო, რომ ადამიანი ობობა სწორედ ის იყო. ცხოვრების ჩვეულ რიტმში დასაბრუნებლად პიტერ პარკერმა დახმარება დოქტორ სტრეინჯს სთხოვა. მას სურდა, შელოცვის შემდეგ ყველას დავიწყებოდა, რომ პიტერ პარკერი ადამიანი ობობა იყო.

თუმცა, ყველაფერი გეგმის მიხედვით არ წავიდა. შელოცვის გამო სხვადასხვა სამყაროს შორის საზღვარი გაიხსნა და პიტერის რეალობაში სხვა ადამიანი ობობების მტრები მოხვდნენ. მათ შესაჩერებლად პიტერ პარკერს ტობი მაგუაირისა და ენდრიუ გარფილდის ადამიანი ობობებიც დაეხმარნენ. მიუხედავად ამისა, მულტივერსის დაშლის საფრთხე კვლავ არსებობდა.

მულტივერსის გადასარჩენად პიტერმა მძიმე გადაწყვეტილება მიიღო — დოქტორ სტრეინჯს სთხოვა, ყველას თავად პიტერ პარკერიც დავიწყებოდა. შელოცვამ იმოქმედა და ფილმის ბოლოს პიტერი სრულიად მარტო დარჩა — ის ემჯეისა და ნედსაც კი აღარ ახსოვდათ. პიტერმა მათთვის სიმართლის თქმა სცადა, თუმცა გადაიფიქრა და ახალი ცხოვრების დაწყება გადაწყვიტა.

როგორია პიტერ პარკერის ცხოვრება ახლა?

Spider-Man: Brand New Day-ის მოქმედება წინა ფილმიდან ოთხი წლის შემდეგ ვითარდება. პიტერ პარკერი უკვე ზრდასრულია, მარტო ცხოვრობს და დანაშაულს, როგორც ადამიანი ობობა ისე ებრძვის.

ოფიციალური აღწერის მიხედვით, ემჯეისა და ნედის მის გარეშე ცხოვრების ყურება პიტერზე სულ უფრო ძლიერად მოქმედებს. ამასთანავე, პიტერ პარკერში უცნაური ფიზიკური ცვლილება იწყება, რომელიც, შესაძლოა, ახალი საფრთხის შესაჩერებლად გადამწყვეტი აღმოჩნდეს. თუმცა, შეძლებს თუ არა მის გაკონტროლებას პიტერ პარკერი, სათუოა.

ვინ ბრუნდება ახალ ფილმში?

ტომ ჰოლანდთან ერთად ფილმში ემჯეის როლში ზენდეიასა და ნედის როლში ჯეიკობ ბატალონის ვიხილავთ.

ფილმში მარკ რუფალო ჰალკის როლში და ჯონ ბერნტალი დაბრუნდებიან, რომელიც კვლავ ფრენკ კასლს, იგივე დამსჯელის როლს შეასრულებს. ახალ ფილმში სედი სინკსა და ლიზა კოლონ-საიასსაც ვიხილავთ, თუმცა მათი პერსონაჟების შესახებ ინფორმაცია ჯერ არ გავრცელებულა.

ძველი მტრის დაბრუნება

Spider-Man: Homecoming-ში მაკ გარგანი მცირე როლით გამოჩნდა და პიტერ პარკერზე შურისძიების სურვილი გამოთქვა. თითქმის ათი წლის შემდეგ პერსონაჟი ბრუნდება — მაიკლ მანდო Spider-Man: Brand New Day-ის მსახიობთა შემადგენლობაშია.

Spider-Man: Brand New Day პიტერ პარკერისთვის ახალი დასაწყისი იქნება. სამყაროს ის აღარ ახსოვს, ძველმა მეგობრებმა ცხოვრება მის გარეშე გააგრძელეს, თავად პიტერი კი ახალი საფრთხის წინაშე დგას.

Spider-Man: Brand New Day კინოთეატრებში 31 ივლისს გამოვა.