რუსეთის ფედერალური უსაფრთხოების სამსახურის ინფორმაციით, Telegram-ის დამფუძნებელი, პაველ დუროვი, საერთაშორისო ძებნილად გამოაცხადეს.

"დუროვს ბრალი წარედგინა სისხლის სამართლის საქმეზე, რუსეთის სისხლის სამართლის კოდექსის 205.1 მუხლის 1.1 ნაწილით გათვალისწინებული დანაშაულის ნიშნებით, რაც ტერორისტული საქმიანობის ხელშეწყობას გულისხმობს", — ნათქვამია უწყების განცხადებაში.

უწყების მტკიცებით, Telegram-ის ადმინისტრაციამ არ წაშალა არხები, რომლებსაც, მათი თქმით, უკრაინის სპეცსამსახურები ტერაქტებისა და მასობრივი მკვლელობების მოსამზადებლად იყენებდნენ. კერძოდ, საუბარია გაცნობის სერვისზე.

მათ მიერ გავრცელებულ ინფორმაციაში ნათქვანია, რომ უკრაინის სპეცსამსახურების თანამშრომლები გოგონების სახელით უკავშირდებოდნენ ახალგაზრდა რუსებს, სთავაზობდნენ შეხვედრას დიდ სავაჭრო ცენტრებში ან სოციალური მნიშვნელობის ობიექტებთან ახლოს, წინასწარ უგზავნიდნენ გეოლოკაციას, ასევე უფინანსებდნენ კინოში ან კონცერტზე ბილეთებს, ან უგზავნიდნენ საჩუქრებს ფიშინგური ბმულების მეშვეობით.

შემდეგ, ამ ახალგაზრდებს უკავშირდებოდნენ კიევის აგენტები, რომლებიც თავს რუსეთის ძალოვანი უწყებების ან როსფინანსმონიტორინგის თანამშრომლებად ასაღებდნენ.

"ცრუ სამართალდამცველები მათ ატყობინებდნენ, რომ გადარიცხული თანხები უკრაინის შეიარაღებული ძალების ანგარიშებზე აღმოჩნდა, ხოლო მათ მიერ გაზიარებული კოორდინატები მოწინააღმდეგემ სარაკეტო და უპილოტო საფრენი აპარატებით თავდასხმების დასაგეგმად გამოიყენა", — აცხადებენ უწყებაში.

რუსეთის ფედერალური უსაფრთხოების სამსახურის მტკიცებით, ფსიქოლოგიური ზეწოლისა და სისხლის სამართლის პასუხისმგებლობით დაშინების შემდეგ, მოქალაქეებს აიძულებდნენ მონაწილეობა მიეღოთ თავდასხმებსა და ხანძრის გაჩენაში, რასაც ე.წ. "ფსევდოოპერატიული ღონისძიებების" ფარგლებში ახორციელებდნენ.

ცნობისათვის, Telegram-ის დამფუძნებელი რუსი მილიონერი პაველ დუროვი ივნისის ბოლოს საქართველოს სტუმრობდა. სოცმედიაში გავრცელდა დუროვის ქართული ოცნების დეპუტატ ვაკო თურნავასთან ერთად გადაღებული ფოტო. VT Sakartvelo News-ის ცნობით, Telegram-ის დამფუძნებელი, სავარაუდოდ, საინვესტიციო-ტექნოლოგიურ კონფერენცია Teacher-ზე დასასწრებად ჩამოვიდა, რომელიც 26-27 ივნისს თბილისში გაიმართება.

თბილისში სტუმრობის შესახებ დუროვი წერს, რომ "ხელისუფლების ბიზნესზე ორიენტირებული პოლიტიკის წყალობით, საქართველო თანდათან მნიშვნელოვან ბიზნესჰაბად ყალიბდება" დუროვი იმასაც აღნიშნავს, რომ აქ აუცილებლად დაბრუნდება.

მეტი პაველ დუროვის შესახებ წაიკითხე აქ: