კულტურის მინისტრის პირველ მოადგილედ მიხეილ კიკნაძე დაინიშნა. შესაბამის ბრძანებას ხელს მთავრობის მეთაური ირაკლი კობახიძე აწერს და ის 28 ივლისით თარიღდება. ირაკლი კობახიძემ კულტურის მინისტრის პოსტიდან თინათინ რუხაძის გათავისუფლების ბრძანებასაც მოაწერა ხელი. დღეიდან კულტურის მინისტრის მოვალეობას მინისტრის პირველი მოადგილე — მიხეილ კიკნაძე შეასრულებს.

მიხეილ კიკნაძის მიერ შევსებული 2025 წლის დეკლარაციის მიხედვით, ის ამ დრომდე კულტურის სამინისტროში შიდა აუდიტისა და მონიტორინგის დეპარტამენტის უფროსია.

სამინისტროში მისვლამდე 2024 წლის იანვრიდან 2024 წლის ნოემბრამდე საქართველოს რკინიგზაში ანალიზისა და მონიტორინგის დეპარტამენტის უფროსი იყო, სადაც 10 თვეში 45 575 ლარი მიიღო ხელფასის სახით; 2024 წელს 2 თვით დასაქმებული იყო შპს "ჯიარ ტრანზიტ ლაინში" შიდა მონიტორინგის მენეჯერად.

შეგახსენებთ, რომ თინათინ რუხაძემ კულტურის მინისტრობიდან გადადგომის შესახებ სოციალურ ქსელში დაწერა და მიზეზად ჯანმრთელობის მდგომარეობა დაასახელა.