ჩეჩნეთის ლიდერმა რამზან კადიროვი განაცხადა, რომ ახმატ კადიროვის საზოგადოებრივმა ფონდმა ღაზის სექტორში ჰუმანიტარული მისია დაიწყო და დახმარების გაწევას დაახლოებით ერთი მილიონი ადამიანისთვის გეგმავს. ამის შესახებ OC Media წერს.

კადიროვის თქმით, 25 ივლისს იძულებით გადაადგილებულ პირთა ბანაკებში უკვე ჩაიტანეს საკვები. მისი ინფორმაციით, პირველი ტვირთი მოიცავდა 40-40 ტონა ფქვილს, შაქარს, მაკარონს, ბრინჯსა და ოსპს — საერთო ჯამში დაახლოებით 200 ტონა პროდუქტს.

მისი განცხადებით, ჰუმანიტარული ოპერაცია ფონდის პრეზიდენტის, რამზანის დედის — აიმანი კადიროვას დავალებით განხორციელდა. მისივე თქმით, დახმარების დარიგებაში ადგილობრივი საქველმოქმედო ორგანიზაციები და მოხალისეები მონაწილეობენ.

ამ დრომდე დამოუკიდებელ წყაროებს არ დაუდასტურებიათ არც მიწოდებული დახმარების მოცულობა და არც ის, რამდენმა ადამიანმა მიიღო რეალურად.

ახმატ კადიროვის საზოგადოებრივი ფონდი რუსეთს გარეთ ჰუმანიტარული პროექტების შესახებ განცხადებებს რეგულარულად ავრცელებს. 2023 წლის შემოდგომაზე, ისრაელსა და Hamas-ს შორის ომის დაწყების შემდეგ, ჩეჩნეთის ხელისუფლება არაერთხელ იუწყებოდა ღაზაში ჰუმანიტარული ტვირთის გაგზავნის შესახებ.

2023 წლის ოქტომბერში კადიროვმა განაცხადა, რომ პალესტინელებს მედიკამენტები, საკვები და სხვა პირველადი საჭიროების ნივთები გადაეცათ. მოგვიანებით ფონდმა ასევე გაავრცელა ინფორმაცია დამატებითი სასურსათო დახმარებისა და ლტოლვილთა ბანაკებში ცხელი საკვების დარიგების შესახებ.

ღაზის მოსახლეობის მხარდაჭერის შესახებ განცხადებების პარალელურად, კადიროვი აკრიტიკებდა ისრაელის სამხედრო მოქმედებებს. 2023 წლის ოქტომბერში მან მუსლიმური უმრავლესობის მქონე ქვეყნებს მოუწოდა, ისრაელზე ზეწოლა მოეხდინათ საომარი მოქმედებების შესაწყვეტად. ამასთან, განაცხადა, რომ თუ რუსეთის ხელისუფლება შესაბამის გადაწყვეტილებას მიიღებდა, ჩეჩნური დანაყოფები სამშვიდობო მისიაში მონაწილეობის მისაღებად მზად იყვნენ.

ახმატ კადიროვის საზოგადოებრივი ფონდი 2004 წელს, ჩეჩნეთის პირველი პრეზიდენტის, ახმატ კადიროვის, მკვლელობის შემდეგ დაარსდა. მიუხედავად იმისა, რომ ოფიციალურად საქველმოქმედო ორგანიზაციად არის რეგისტრირებული, იგი ჩეჩნეთის პოლიტიკურ ცხოვრებაშიც მნიშვნელოვან როლს ასრულებს.

რუსეთის მიერ უკრაინაში სრულმასშტაბიანი შეჭრის დაწყების შემდეგ, ფონდი რეგულარულად იუწყება, რომ რუსეთის შეიარაღებული ძალებისთვის, მათ შორის ომში ჩართული ჩეჩნური დანაყოფებისთვის, სამხედრო ტექნიკას, დამცავ აღჭურვილობას, ავტომობილებსა და უპილოტო საფრენ აპარატებს ყიდულობს.

ამავდროულად, ფონდი საჯაროდ კვლავ საკუთარ თავს ჩრდილოეთ კავკასიაში ერთ-ერთ უმსხვილეს საქველმოქმედო ორგანიზაციად წარმოაჩენს.

აიმანი კადიროვა აშშ-მა სანქციების სიაში 2023 წლის ივნისში შეიყვანა, ხოლო ახმატ კადიროვის საზოგადოებრივი ფონდი ამერიკის სანქციების ქვეშ 2020 წლიდან იმყოფება.