აშშ-ის სენატმა რუსეთის წინააღმდეგ სანქციების შესახებ კანონპროექტი პირველი, პროცედურული კენჭისყრით დაამტკიცა. დოკუმენტს მხარი 86-მა სენატორმა დაუჭირა, წინააღმდეგ კი 12-მა მისცა ხმა.

პროცედურული კენჭისყრა კანონპროექტის სენატში განხილვისა და მასზე წერილობითი შესწორებების წარდგენის გზას ხსნის. ამის შემდეგ გაიმართება საბოლოო კენჭისყრა, რომლის წარმატებით დასრულების შემთხვევაში კანონპროექტი წარმომადგენელთა პალატას გადაეგზავნება, საბოლოოდ კი მის ძალაში შესასვლელად აშშ-ის პრეზიდენტის ხელმოწერა იქნება საჭირო.

კენჭისყრა გაიმართა უკრაინის პრეზიდენტ ვოლოდიმირ ზელენსკისა და სენატორების დახურული შეხვედრის დასრულებისთანავე, ასევე სენატორ ლინდსი გრემის გამოსამშვიდობებელი ცერემონიის შემდეგ. სწორედ გრემი იყო აღნიშნული კანონპროექტის ერთ-ერთი მთავარი ინიციატორი.

"სიმბოლურია, რომ სწორედ დღეს, სენატორ ლინდსი გრემთან გამომშვიდობების დღეს, სენატში გაიმართა პროცედურული კენჭისყრა რუსეთის წინააღმდეგ სანქციების შესახებ კანონპროექტზე, რომელზეც მან ამდენი იშრომა. ჩემთვის დიდი პატივი იყო ხმების დათვლის პროცესზე დასწრება — დოკუმენტს 86-მა სენატორმა დაუჭირა მხარი. ეს ლინდსის გეგმების განხორციელებისკენ გადადგმული პირველი ნაბიჯია და, უდავოდ, მშვიდობისკენ გადადგმული ნაბიჯიც", — განაცხადა უკრაინის პრეზიდენტმა.

კანონპროექტი აშშ-ის პრეზიდენტს უფლებას აძლევს, 100%-იანი საბაჟო ტარიფები დააწესოს იმ ქვეყნების იმპორტზე, რომლებიც რუსულ ნავთობს, ურანსა და ბუნებრივ აირს ყიდულობენ ან რუსეთისთვის დაწესებული სანქციების გვერდის ავლას უწყობენ ხელს.

დოკუმენტი ასევე ითვალისწინებს სანქციების დაწესებას რუსეთის თავდაცვის, ენერგეტიკისა და საფინანსო სექტორის ორგანიზაციების, რუსეთის ე.წ. "ჩრდილოვანი ფლოტის", ასევე რუსი მაღალჩინოსნების, ოლიგარქებისა და მათი ოჯახის წევრების მიმართ.

ამას გარდა, 28 ივლისს აშშ-მა სენატორებმა რუსეთზე სანქციების შესახებ ორპარტიული კანონპროექტი განაახლეს და მისი მოქმედების არეალი ირანზეც გააფართოვეს. შესაბამისად, დოკუმენტს ახალი სახელწოდება აქვს — "ლინდსი ო. გრემის 2026 წლის რუსეთისა და ირანის სანქციების აქტი".