28 ივლისს იაპონიის სამხრეთ-დასავლეთ კუნძულ კიუსიუზე მომხდარ ძლიერ მიწისძვრას სულ მცირე 18 ადამიანი ემსხვერპლა.

მანამდე, ოთხშაბათს, 29 ივლისს, იაპონური მაუწყებელი NHK პრემიერმინისტრ სანაე ტაკაიტიზე დაყრდნობით 13 დაღუპულის შესახებ იუწყებოდა. წინა საღამოს გავრცელებული ინფორმაციით, სტიქიის შედეგად 50 ადამიანი დაშავდა.

მოგვიანებით ქალაქ იაცუშიროს ხელისუფლებამ კიდევ ხუთი დაღუპულის შესახებ განაცხადა. ისინი ადგილობრივ ქაღალდის ქარხანაში მუშაობდნენ, როდესაც კატასტროფა მოხდა.

NHK-ის ცნობით, 28 ივლისს მომხდარი 7.1 მაგნიტუდის მიწისძვრის შემდეგ, 29 ივლისის ადგილობრივი დროით 14:00 საათამდე 190 განმეორებითი ბიძგი დაფიქსირდა.

გამოცემის ინფორმაციით, მაშველები ამ დრომდე აგრძელებენ ნანგრევების გაწმენდას ქალაქ კაშიმაში (კუმამოტოს პრეფექტურა) მდებარე Aeon-ის სავაჭრო ცენტრში, სადაც მიწისძვრის შემდეგ, სავარაუდოდ, ბუნებრივი აირის აფეთქება მოხდა.

პოლიციის ცნობით, აფეთქებამდე შენობიდან ევაკუაცია დაახლოებით 200-მა ადამიანმა — მყიდველებმა, სავაჭრო ცენტრის თანამშრომლებმა და სხვა პირებმა — შეძლო.

პრემიერმინისტრ სანაე ტაკაიტის განცხადებით, სავაჭრო ცენტრის ჩამონგრევის შედეგად სამი ადამიანი დაიღუპა, რამდენიმე კი ნანგრევებშია მოყოლილი.

29 ივლისის დღის მეორე ნახევარში Aeon-მა განაცხადა, რომ 2 700 თანამშრომლის მდგომარეობას ამოწმებს. არსებული მონაცემებით, ოთხი მათგანი ამ დრომდე უგზო-უკვლოდ დაკარგულად ითვლება.

ამასთან, ქალაქ იაცუშიროში მდებარე Nippon Paper Industries-ის ქარხანაში, სადაც მიწისძვრის შედეგად საკვამლე მილი ჩამოინგრა, ორი ადამიანი გულისა და სუნთქვის გაჩერებულ მდგომარეობაში იპოვეს. (იაპონიაში მაშველებს გარდაცვალების ოფიციალურად დადასტურების უფლებამოსილება არ აქვთ.) კიდევ ცხრა ადამიანთან დაკავშირება ამ დრომდე ვერ ხერხდება.

კიუსიუს კუნძულზე მომხდარმა მიწისძვრამ ფართომასშტაბიანი ზიანი გამოიწვია. გარდა მსხვერპლისა, სტიქიამ დაანგრია ხიდები, საცხოვრებელ სახლებში ხანძრები გააჩინა და ელექტროენერგიის მასშტაბური გათიშვები გამოიწვია.

ამავდროულად, იაპონიის მეტეოროლოგიური სააგენტო მოსახლეობას ახალი ძლიერი მიწისძვრების შესაძლებლობის შესახებ აფრთხილებს.

"გვსურს, მოსახლეობამ მომდევნო ერთი კვირის განმავლობაში, განსაკუთრებით კი უახლოეს ორ-სამ დღეში, განსაკუთრებული სიფრთხილე გამოიჩინოს, რადგან შესაძლოა 7 მაგნიტუდამდე სიმძლავრის ახალი მიწისძვრები მოხდეს", — ციტირებს NHK სააგენტოს წარმომადგენლის განცხადებას.