შინაგან საქმეთა სამინისტრომ ჭიდაობის ფედერაციის პრეზიდენტი თამაზ (გეგა) გეგეშიძე, სპორტის სასახლეში, სპორტსმენ ზურაბ დათუნაშვილის მიმართ განხორციელებული ძალადობის ბრალდებით დააკავა.

გამოძიების ვერსიით, 11 იანვარს, სპორტის სასახლეში მომხდარი დაპირისპირებისას, თამაზ გეგეშიძემ ფიზიკური შეურაცხყოფა მიაყენა სპორტსმენ ზურაბ დათუნაშვილს.

შინაგან საქმეთა სამინისტროში სპორტის სასახლეში მომხდარ ფაქტთან დაკავშირებით, გამოძიება საქართველოს სისხლის სამართლის კოდექსის 126-ე და 239-ე მუხლებით გრძელდება, რაც ძალადობასა და ძალადობრივი ქმედებისკენ საჯაროდ მოწოდებას გულისხმობს. შინაგან საქმეთა სამინისტროს განცხადებით, ინფორმაციის ნებაყოფლობით მოწოდებაზე უარის თქმის გამო, კონფლიქტის შემსწრე პირები დაიკითხნენ მაგისტრატ მოსამართლესთან.

დღეს, 22 იანვარს სასამართლოში დაიკითხა სპორტსმენი ზურა დათუნაშვილი. მან ჟურნალისტებთან საუბრისას აღნიშნა, რომ "არავის დაკავება არ სურს" და მოითხოვს გეგეშიძემ დატოვოს ფედერაციის პრეზიდენტის თანამდებობა.

გუშინ, 21 იანვარს ტელეკომპანია იმედთან ინტერვიუსას გეგეშიძემ თქვა, რომ მომხდარი ინციდენტის დროს მას არავისთვის არაფერი ჩაურტყამს და არც ჯაჭვი სჭერია ხელში:

"ჩხუბი არა, უფრო შეხლა-შემოხლა იყო. ვის წარბი გაუსკდა და ვის თავი გაუტყდა, ეს არავის დაუნახავს".

11 იანვარს ბერძნულ-რომაულ ჭიდაობაში საქართველოს ჩემპიონატის ფინალის დროს ინციდენტი მოხდა. რუსთავი 2-ის მიერ გავრცელებულ კადრებში ჩანს, რომ მოჭიდავე ზურაბ დათუნაშვილს მუშტი სახეში საქართველოს ჭიდაობის ეროვნული ფედერაციის პრეზიდენტმა თამაზ (გეგა) გეგეშიძემ ჩაარტყა. ვიდეომასალის მიხედვით, ფედერაციის პრეზიდენტში ხელში რაღაც ნივთი უჭირავს, რომელსაც სპორტსმენის მიმართულებით იქნევს და შემდეგ მუშტს არტყამს. ამ ფაქტის შემდეგ დათუნაშვილს სახიდან სისხლი მოსდის.