ჰოლივუდის მსახიობი შეილინ ვუდლი საქართველოში Netflix-ის საერთაშორისო პროექტის გადაღებებისთვის იმყოფებოდა. პროექტის ერთ-ერთი მთავარი ეპიზოდი მთლიანად საქართველოს დაეთმობა და ქვეყნის კულტურას, გასტრონომიასა და ტურისტულ ადგილებს საერთაშორისო აუდიტორიას გააცნობს.

პროექტი საქართველოს ტურიზმის ეროვნული ადმინისტრაციის მარკეტინგული კამპანიის ფარგლებში ხორციელდება. გადაღებები კი აჭარაში, სამეგრელოში, იმერეთში, სამცხე-ჯავახეთსა და მცხეთა-მთიანეთში მიმდინარეობდა. პროექტის სახელწოდება, ფორმატი და Netflix-ზე გამოსვლის თარიღი ჯერჯერობით უცნობია.

შეილინ ვუდლი საქართველოში.

ფოტო: მზისკარი

ფოტო: მზისკარი

გადაღებებისას შეილინ ვუდლი მზისკარის მასპინძლებსაც ესტუმრა. იმერეთში, აგროსაოჯახო სასტუმრო ქორენაში, ქართული ოჯახური სტუმართმოყვარეობასა და ტრადიციულ კერძებს, სამეგრელოში კი ეთნოსოფელ სისატურაში მეგრულ გასტრონომიასა და ადგილობრივი ცხოვრების წესს გაეცნო. მსახიობის ვიზიტის ამსახველი ფოტოები სოციალურ ქსელებშიც გავრცელდა.

"საქართველოს გემო, სტუმართმოყვარეობა და ისტორიები მალე Netflix-ზე მილიონობით მაყურებლამდე მიაღწევს. სწორედ ასეთი ადამიანები და ადგილებია მზისკარის მთავარი ღირებულება — მასპინძლები, რომლებიც საქართველოს ისტორიას, კულტურასა და კულინარიულ ტრადიციებს ყოველდღიური ცხოვრებით აცოცხლებენ", — ვკითხულობთ მზისკარის ფეისბუქის პოსტში.

შეილინ ვუდლი ფართო აუდიტორიამ დივერგენტით გაიცნო. გარდა ამისა, ის ბედის ვარსკვლავის ბრალიასა და შთამომავლებში, ასევე HBO-ს სერიალში დიდი პატარა ტყუილები მნიშვნელოვანს როლებს ასრულებს.