უკრაინის პრეზიდენტ ვოლოდიმირ ზელენსკის ადმინისტრაციამ ქვეყნის გენერალურ პროკურორს მიმართა, განიხილოს ბელარუსის პრეზიდენტ ალექსანდრ ლუკაშენკოს წინააღმდეგ სისხლის სამართლის საქმის აღძვრის შესაძლებლობა. ამის შესახებ Reuters წერს.

ლუკაშენკომ, რომელიც რუსეთის პრეზიდენტ ვლადიმირ პუტინის ახლო მოკავშირეა, 2022 წლის თებერვალში მოსკოვს ბელარუსის ტერიტორიის გამოყენების უფლება მისცა, საიდანაც უკრაინაში სრულმასშტაბიანი შეჭრა დაიწყო.

უკრაინის პრეზიდენტის ადმინისტრაციის განმარტებით, ეს გადაწყვეტილება ბელარუსის დემოკრატიული ფორუმის მიმართვის საპასუხოდ ხდება. ემიგრაციაში მყოფმა ოპოზიციურმა გაერთიანებამ მაისში კიევს მოუწოდა, ლუკაშენკოს წინააღმდეგ ომის დანაშაულების, გენოციდისა და "სახელმწიფო ტერორის" ბრალდებებით სამართლებრივი დევნა დაეწყო.

ფორუმი ლუკაშენკოს რუსეთის ომში თანამონაწილეობასა და სულ მცირე 2 442 უკრაინელი ბავშვის ბელარუსში იძულებით გადაყვანაში ადანაშაულებს. ორგანიზაციის მტკიცებით, ეს პროცესი იმ პროგრამის ფარგლებში განხორციელდა, რომელიც Yale Humanitarian Research Lab-მა დააფიქსირა.

ლუკაშენკოს ადმინისტრაციას ამ საკითხზე კომენტარი არ გაუკეთებია. თავად ბელარუსის პრეზიდენტი 2023 წელს აცხადებდა, რომ უკრაინიდან ჩაყვანილი ბავშვები ბელარუსში დროებით იმყოფებოდნენ, რათა ომისგან მიღებული ფსიქოლოგიური ტრავმისგან გამოჯანმრთელებაში დახმარებოდნენ.

ზელენსკის ადმინისტრაციასა და უკრაინის გენერალურ პროკურატურას დამატებითი კომენტარი ამ დრომდე არ გაუკეთებიათ.

ბოლო კვირების განმავლობაში ვოლოდიმირ ზელენსკიმ ლუკაშენკოს მიმართ უფრო მკაცრი პოზიცია დაიკავა. გასულ თვეში მან ბელარუსის ლიდერს ულტიმატუმიც წაუყენა და მოითხოვა, დაეშალა სიგნალის გადამცემი სადგურები, რომლებიც, კიევის მტკიცებით, რუსულ დრონებს უკრაინაზე თავდასხმაში ეხმარებოდა.

თავის მხრივ, ლუკაშენკომ ამ თვეში კიდევ ერთხელ განაცხადა, რომ ბელარუსის არმიას ომში არ ჩართავს.

ამის მიუხედავად, ლუკაშენკო კვლავ მხარს უჭერს პუტინს. კერძოდ, მან მოსკოვს ბელარუსის ტერიტორიაზე ტაქტიკური ბირთვული რაკეტების განთავსებისა და ქვეყნის სამხედრო ბაზებისა და საწვრთნელი პოლიგონების გამოყენების უფლება მისცა.