თუ აქამდე რეკლამების გავლენის ქვეშ, ძვირიან, ანტიბაქტერიულ საპნებს ყიდულობდით, დროა თქვენი ფული დაზოგოთ და ჩვეულებრივ საპნებზე გადაერთოთ.

აშშ-ს საკვებისა და წამლების ადმინისტრაციამ (FDA) გამოაქვეყნა ახალი, სიღრმისეული ანგარიში, სადაც ნათქვამია, რომ არ არსებობს მტკიცებულება, რომელიც ადასტურებს ე.წ. "ანტიბაქტერიული" საპნების უპირატესობას ჩვეულებრივი საპნების მიმართ, როდესაც საქმე ეხება ბაქტერიების ან ვირუსების გავრცელებას.

გარდა ამისა, სააგენტოს ახალი წესით, კომპანიებს აეკრძალათ საკუთარ პროდუქტებში 19 პოპულარული "ანტიბაქტერიული" ქიმიკატის გამოყენება, ისეთების, როგორებიცაა ტრიკლოზანი და ტრიკლოკარბანი. მწარმოებლებს პროდუქციის შემადგენლობის შესაცვლელად და ბაზრიდან აღნიშნული ქიმიკატების შემცველი მარაგის ამოსაღებად ერთ-წლიანი ვადა მიეცათ.

არ არსებობს სამეცნიერო მტკიცებულება, რომელიც ანტიბაქტერიული საპნების ეფექტიანობას ადასტურებს

"მომხმარებლები ფიქრობენ, რომ ხელის ანტიბაქტერიული საპნით დაბანა უფრო ეფექტიანია ბაქტერიების მოსაშორებლად, თუმცა, არ არსებობს სამეცნიერო მტკიცებულება, რომელიც ამას ადასტურებს", აცხადებს ჯანეტ ვუდკოკი, FDA-ს მედიკამენტების შეფასებისა და კვლევის ცენტრის დირექტორი. "ზოგი მონაცემი იმასაც კი აჩვენებს, რომ შესაძლოა, ანტიბაქტერიული ინგრედიენტები, დროთა განმავლობაში, უფრო მეტ ზიანს აყენებს ორგანიზმს, ვიდრე - სარგებელს."

კონკრეტულად კი, სააგენტოს ინფორმაციაში ნათქვამია, რომ ცხოველებზე დაკვირვებისას, ტრიკლოზანის მსგავსი ქიმიკატების გრძელვადიანი ზემოქმედების შემდეგ, ირღვეოდა სხეულის ჰორმონალური ფუნქცია. დამატებით, არსებობს ეჭვი, რომ ბაქტერიებთან მებრძოლი ქიმიკატები ხელს უწყობს ანტიბიოტიკ-გამძლე ბაქტერიების წარმოშობას. ანტიბიოტიკების მიმართ რეზისტენტული ბაქტერიების გამო, უკანასკნელ წლებში, მსოფლიოს გარშემო ათასობით ადამიანი იღუპება, მკვლევარების აზრით, ეს რიცხვი მომავალ ათწლეულებში მილიონობით გაიზრდება.

მწარმოებლების ნაწილმა აკრძალული ქიმიკატების ამოღება უკვე დაიწყო საკუთარი პროდუქციიდან. თუმცა, Washington Post-ის ინფორმაციით, აშშ-ს ბაზარზე არსებული, ორ ათასამდე ანტიბაქტერიული პროდუქტის უმეტესობა, 19 აკრძალული ქიმიკატიდან ერთს მაინც შეიცავს.

FDA-ს განცხადებაში აღნიშნულია, რომ აკრძალვა არ შეეხება ხელის საწმენდ სითხეებს (ე.წ. სანიტაიზერებს) და ჯანდაცვის სფეროში გამოყენებად ანტიბაქტერიულ პროდუქტებს.