საქართველოს პრეზიდენტის, სალომე ზურაბიშვილის განცხადებით, მისი შესაფასებელი არ არის ის პროცესები, რაც მმართველ გუნდში მიმდინარეობს, თუმცა იმედოვნებს, რომ მისი შერიგების ფუნქცია ქართულ ოცნებაზეც გავრცელდება.

"ჩემი შესაფასებელი არ არის ის პროცესები, რაც მიმდინარეობს გუნდის შიგნით. თუ მეკითხებით პირად გრძნობებს ქართული ოცნების რომელიმე წევრის მიმართ, ეს არ არის ის ადგილი, სადაც უნდა გაგიზიაროთ ჩემი პირადი გრძნობები. მე მოვედი იმ ფუნქციით, რომ ვიქნებოდი შერიგების პრეზიდენტი და იმედი მაქვს შერიგება, რომელიც სხვანაირად მქონდა წარმოდგენილი ასევე მმართველ გუნდზეც გავრცელდება და დღევანდელი პოლიტიკური დისკუსიები თუ დებატები ამ პროცესის ირგვლივ არ გადაიქცევა უფრო ღრმა დაპირისპირებად", — განაცხადა ზურაბიშვილმა.

მისი თქმით, დარწმუნებულია, რომ საზოგადოებას სჭირდება მეტი დაწყნარება, მეტი კონსენსუსი მთავარ საკითხებზე და სასამართლოს დამოუკიდებლობა არის ის საკითხი, რომლის ირგვლივაც ყველა უნდა ვიყოთ გაერთიანებული.

კითხვაზე, როგორ აპირებს შერიგების ფუნქციის შესრულებას მმართველი გუნდის შემთხვევაში, სალომე ზურაბიშვილი პასუხობს, რომ პროცესებში არ ჩაერევა.

"ის ფაქტი, რომ თუნდაც მმართველ გუნდში ან ნებისმიერ სხვა პოლიტიკურ გაერთიანებაში იყოს ამ ტიპის დისკუსიები ეს არის ნორმალური, საჭირო. არ არსებობს დემოკრატიული პროცესები, სადაც დროთა განმავლობაში უფრო მძაფრი დისკუსიები არ არის, მე ვიმედოვნებ, ეს არ გადაიზრდება უფრო მძაფრ დაპირისპირებაში, რომელიც ქვეყანას არ სჭირდება, ჩვენ ომის პირას ნამდვილად არ ვართ", — განაცხადა ზურაბიშვილმა.

დაპირისპირება ქართულ ოცნებაში

იურიდიულ საკითხთა კომიტეტის თავმჯდომარე, ეკა ბესელია თანამდებობიდან 27 დეკემბერს გადადგა. მისი თქმით, ამით უზენაესი სასამართლოს მოსამართლეების დამტკიცებას შეუშალა ხელი.

მიუხედავად იმისა, რომ დღემდე არ არსებობს პროცედურა, რომლითაც იუსტიციის უმაღლესმა საბჭომ მოსამართლეობის კანდიდატები უნდა შეარჩიოს, უზენაესი სასამართლოს მოსამართლეობის 10 კანდიდატი უკვე წარდგენილია. ამის გამო, არასამთავრობო ორგანიზაციების ნაწილსა და საბჭოს არამოსამართლე წევრებს პროცესის ობიექტურობასა და მიუკერძოებლობაზე კითხვები უჩნდებათ.

ეკა ბესელიას გადადგომას მმართველ გუნდში დაპირისპირება მოჰყვა. პარლამენტის თავმჯდომარის, ირაკლი კობახიძის თქმით, ბესელიას გადადგომის მიზეზები პარტიის შიდა სამზარეულოა, რომელსაც ნაწილობრივ გარეთ გამოიტანეს.

იურიდიულ საკითხთა კომიტეტის პირველ მოადგილედ გედევან ფოფხაძე 31 დეკემბერს აირჩიეს. საქართველოს პარლამენტის თავმჯდომარე ფიქროს, რომ მისი არჩევა რეგლამენტის დარღვევით მოხდა. ეკა ბესელიას თქმით, რეგლამენტს კარგად იცნობს და იმოქმედა წესების შესაბამისად.

ამასთანავე, პარლამენტის თავმჯდომარემ განაცხადა, რომ თუ ვინმე წავა ქართული ოცნების გუნდის წინააღმდეგ, ამას პასუხი აუცილებლად გაეცემა.

10 იანვარს ქართული ოცნების თავმჯდომარემ, ბიძინა ივანიშვილმა განცხადება გაავრცელა, რომელშიც აღნიშნა, რომ ეკა ბესელია იურიდიულ საკითხთა კომიტეტის თავმჯდომარის თანამდებობიდან გადადგომის შემდეგ პარტიის და გუნდურობის პრინციპების წინააღმდეგ წავიდა.