ბოლო ინფორმაციით, ე.წ. ღორის გრიპით 8 ადამიანი გარდაიცვალა. ამის შესახებ On.ge-ს დაავადებათა კონტროლის ეროვნული ცენტრის გენერალურმა დირექტორმა, ამირან გამყრელიძემ უთხრა.

მისი თქმით, რვავე გარდაცვალების შემთხვევაში მიზეზი H1N1 ტიპის ვირუსი ანუ ე.წ. ღორის გრიპია.

დაავადებათა კონტროლის ეროვნული ცენტრის სამეცნიერო საბჭოს თავმჯდომარის, პაატა იმნაძის თქმით, ბოლო ორ კვირაში დაფიქსირდა გრიპის შემთხვევების მატება. მისივე განმარტებით, ავადობა არის ისეთივე როგორიც იყო შარშან წინ ამ დროს და მეტია, ვიდრე იყო შარშან ამ დროს. პაატა იმნაძე ამბობს, რომ ეპიდემიის საფრთხე ჯერჯერობით არ არსებობს.

პაატა იმნაძის რეკომენდაციები

სეზონური გრიპი

დაავადებათა კონტროლის ცენტრის სარეკომენდაციო ბროშურაში წერია, რომ გრიპი მსოფლიოში ერთ-ერთი ყველაზე უფრო გავრცელებული ინფექციაა. გრიპის სეზონური ეპიდემია ყოველწლიურად 3-5 მილიონ მძიმე შემთხვევას იწვევს მსოფლიოში. ცნობილია გრიპის ვირუსის სამი ტიპი: A, B, C. ამჟამად, მსოფლიოში სეზონურ გრიპს იწვევს A(H3N2), A(H1N1) ქვეტიპის და B ტიპის ვირუსები. გრიპის C ტიპის ვირუსი ხასიათდება მსუბუქი სიმპტომატიკით და ლოკალური ეპიდაფეთქებებით.

რეკომენდაციები

თუ ადამიანს გამოუვლინდა გრიპის სიმპტომები: უცაბედად დაწყებული მაღალი
ცხელება, ყელის ტკივილი, ხველა და საერთო ინტოქსიკაცია, კუნთების,
სახსრების, თავის ტკივილი, მაშინ:

• მაქსიმალურად უნდა მოერიდოს საზოგადოებრივი თავშეყრის ადგილებს;
• სასკოლო, სააღმზრდელო დაწესებულებებში არ დაუშვან გრიპისმაგვარი დაავადების სიმპტომების მქონე პირები;
• ყველა დაავადებულმა გამოიჩინოს მოქალაქეობრივი პასუხისმგებლობა და გრიპისმაგვარი დაავადების სიმპტომებისას, ექიმთან მიმართვამდე, მოახდინოს თვითიზოლაცია;
• განსაკუთრებული სიფრთხილე გამოიჩინონ ორსულებმა და ქრონიკული დაავადებების მქონე პირებმა;
• გააქტიურეთ ხელების ჰიგიენის პროცედურები;
• სპირტისშემცველი ხელის დასამუშავებლებით აღიჭურვოს ისეთი საზოგადოებრივი თავშეყრის ადგილები, სადაც მოსალოდნელია დაავადებულ პირთა კონცენტრაცია: აფთიაქები, პოლიკლინიკები, საავადმყოფოები, საბანკო მომსახურების ცენტრები, სატელეფონი კავშირგაბმულობისა და სხვა მომსახურების ოფისები;
• ხელის დასამუშავებლები უნდა განლაგდეს მოქალაქეთათვის ხელმისაწვდომ და თვალსაჩინო ადგილას;
• სივრცეები, სადაც იმყოფება ან იმყოფებოდა დაავადებული, საჭიროებს სტანდარტულ სანიტარულ დასუფთავებას სველი წესით, სპეციალური სადეზინფექციო სამუშაოების გარეშე;
• რეკომენდებულია სათავსოების ხშირი განიავება;
• გრიპის სიმპტომების გამოჩენისთანავე მიმართეთ ექიმს;
• იმ შემთხვევაში თუ გამოვლინდება ისეთი სიმპტომები, როგორიცაა - სუნთქვის გართულება, ქოშინი, ცხვირ-ტუჩის მიდამოს ციანოზი, მოვარდისფრო სისხლიანი ნახველი, ლეთარგია, გახანგრძლივებული ცხელება, ჩვილ ბავშვებში — ძუძუს წოვის შეუძლებლობა, გაუწყლოება, ყიფლიბანდის დაძაბულობა — სასწრაფოდ მიმართეთ ექიმს. შესაძლოა თქვენ გესაჭიროებოდეთ ჰოსპიტალიზაცია და სპეციფიკური მკურნალობა;
• გრიპით დაავადებულთა სამკურნალოდ არ გამოიყენება ანტიბიოტიკი!

დეტალური რეკომენდაციები წაიკითხეთ აქ.