საქართველოს პარლამენტის იურიდიულ საკითხთა კომიტეტის უკვე ყოფილი თავმჯდომარე, ეკა ბესელია არ ეთანხმება ქართული ოცნების რამდენიმე დეპუტატის განცხადებას, რომ გედევან ფოფხაძე კომიტეტის პირველ მოადგილედ რეგლამენტის დარღვევით აირჩიეს.

მისი თქმით, ის გაყვა რეგლამენტს, მიუხედავად იმისა, რომ სხდომის დაწყებამდე "გარკვეული უცნაურობები ხდებოდა.

"ეს 6 წელი უქმად არ გამიტარებია. გარდა იმისა, რომ სხვა ბევრ კანონზე ვმუშაობდი, რეგლამენტსაც კარგად ვიცნობ და ბევრიც ვიმეცადინე სხვებისგან განსხვავებით, რომ რეგლამენტის ყველა ნორმა ვიცოდე, რა შემთხვევაში რომელი ნორმა მოქმედებს და კონკრეტულ სიტუაციაში როგორ უნდა მუშაობდეს პარლამენტი", — განაცხადა დეპუტატმა.

ის ამბობს, რომ კომიტეტს მიეცა შესაძლებლობა ემსჯელა და კენჭი ეყარა არა ერთი, არამედ სამი კანდიდატისთვის.

"ამ კომიტეტის თავმჯდომარე უნდა იყოს ადამიანი, ვინც პრინციპულად დაიცავს იმ ფასეულობებსა და ღირებულებებს, რომელსაც კომიტეტი და პირადად მე ვიცავდი. თავმჯდომარე უნდა იყოს ის ადამიანი, რომელსაც ასევე პრინციპული პოზიცია ექნება ისეთ საკითხთან მიმართებაში, როგორიც არის მართლმსაჯულების რეფორმა", — განაცხადა ეკა ბესელიამ.

საქართველოს პარლამენტის თავმჯდომარე ირაკლი კობახიძე აცხადებს, რომ გედევან ფოფხაძის არჩევა იურიდიულ საკითხთა კომიტეტის პირველ მოადგილედ რეგლამენტის დარღვევით მოხდა.

ირაკლი კობახიძე ერთადერთი არ არის, ვინც თქვა, რომ გედევან ფოფხაძე რეგლამენტის დარღვევით აირჩიეს. თავმჯდომარის აზრს იზიარებს იურიდიულ საკითხთა კომიტეტის წევრი დავით მათიკაშვილი და სივრცე-დროა საკითხთა კომიტეტის თავმჯდომარე, გიორგი კახიანი.

იურიდიულ საკითხთა კომიტეტის პირველ მოადგილედ ქართული ოცნების დეპუტატი გედევან ფოფხაძე აირჩიეს. მან თავმჯდომარის მოვალეობები უნდა შეასრულოს. ამავე დროს, ფოფხაძე პირველი მოადგილე ადამიანის უფლებათა დაცვის კომიტეტშიც არის და არჩევის შემდეგ აღნიშნული კომიტეტი უნდა დატოვოს.

31 დეკემბრის კომიტეტი სხდომაზე კომიტეტის ყოფილმა თავმჯდომარემ, ეკა ბესელიამ გედევან ფოფხაძის გარდა კიდევ ორი კანდიდატურა, ლევან გოგიჩაიშვილი და რუსლან პოღოსიანი წარადგინა.

სხდომის დასაწყისში სამი კანდიდატურის დაყენებას უკმაყოფილება მოჰყვა ქართული ოცნების ზოგიერთი დეპუტატის მხრიდან. დავით მათიკაშვილმა ეკა ბესელია რეგლამენტის დარღვევაში დაადანაშაულა.

მისი თქმით, სხდომის დღის წესრიგში მხოლოდ ერთი კანდიდატურა იყო შეყვანილი, ხოლო სხდომაზე ბესელიამ კიდევ ორი კანდიდატურა დაამატა, რაც მისი განცხადებით რეგლამენტის დარღვევაა. ბესელიას განმარტებით, სხდომის საკითხი თავმჯდომარის პირველი მოადგილის არჩევა იყო, შესაბამისად, დამატებითი კანდიდატურების წამოყენების კანონიერი უფლება ჰქონდა.

იურიდიულ საკითხთა კომიტეტის თავმჯდომარე, ეკა ბესელია თანამდებობიდან 27 დეკემბერს გადადგა. მისი თქმით, ამით უზენაესი სასამართლოს მოსამართლეების დამტკიცებას შეუშალა ხელი. მისი განმარტებით, ის მას შემდეგ გადადგა, რაც მისმა მოადგილემ, ვანო ზარდიაშვილმა თანამდებობების დატოვების მოთხოვნით მიმართა. ბესელიას გადადგომის შემდეგ ზარდიაშვილს მოუწევდა ამ თანამდებობაზე მუშაობა.

ეკა ბესელიას გადადგომას მმართველ გუნდში დაპირისპირება მოჰყვა. პარლამენტის თავმჯდომარის, ირაკლი კობახიძის თქმით, ბესელიას გადადგომის მიზეზები პარტიის შიდა სამზარეულოა, რომელსაც ნაწილობრივ გარეთ გამოიტანეს.

იუსტიციის უმაღლესმა საბჭომ უზენაესი სასამართლოს მოსამართლეობის 10 კანდიდატი წარადგინა. ამის მიუხედავად, დღემდე არ არსებობს პროცედურა, რომლითაც იუსტიციის უმაღლესმა საბჭომ მოსამართლეობის კანდიდატები უნდა წარადგინოს. ამ მიზეზით, არასამთავრობო ორგანიზაციების ნაწილსა და საბჭოს არამოსამართლე წევრებს პროცესის ობიექტურობასა და მიუკერძოებლობაზე კითხვები უჩნდებათ.

ამავე თემაზე: სასამართლოს სუიციდად შეფასებული გადაწყვეტილება და უვადო მოსამართლეობის 10 კანდიდატი