იუსტიციის უმაღლესი საბჭოს არამოსამართლე წევრები, ანა დოლიძე და ნაზი ჯანეზაშვილი პარლამენტს მოსამართლის წარდგენის წესის შეცვლის მოთხოვნით მიმართავენ. მათი განცხადებით, საჭიროა საკანონმდებლო ცვლილებები, რომელიც გამორიცხავს "ჩინჩალაძის კლანის" ინტერესების გატარებას და პარლამენტს მისცემს შანსს აირჩიოს ღირსეული მოსამართლეები.

მათივე თქმით, ამისთვის იუსტიციის საბჭოს მხოლოდ იმ შემთხვევაში უნდა შეეძლოს პარლამენტისთვის უზენაესი სასამართლოს კანდიდატის შეთავაზება თუ მას საბჭოს ყველა წევრი დაუჭერს მხარს.

დღეისათვის მოსამართლის დანიშვნის და წარდგენის გადაწვეტილება მიიღება ხმათა უმრავლესობით ანუ 2/3-ით. ნაზი ჯანიეზაშვილის თქმით, მურუსიძის პროცესზე გამოჩნდა, რომ მისი და ანა დოლიძის ხმამ გადამწყვეტი მნიშვნელობა ვერ ითამაშა. ლევან მურუსიძე უვადო მოსამართლედ 11 ხმით გაამწესეს.

იუსტიციის უმაღლესმა საბჭომ უზენაესი სასამართლოს მოსამართლეობის 10 კანდიდატი წარადგინა. ამის მიუხედავად, დღემდე არ არსებობს პროცედურა, რომლითაც იუსტიციის უმაღლესმა საბჭომ მოსამართლეობის კანდიდატები უნდა წარადგინოს. ამ მიზეზით, არასამთავრობო ორგანიზაციების ნაწილსა და საბჭოს არამოსამართლე წევრებს პროცესის ობიექტურობასა და მიუკერძოებლობაზე კითხვები უჩნდებათ.

დასახელებულ კანდიდატებს შორის არიან: თამარ ალანია; მერაბ გაბინაშვილი; დიმიტრი გვრიტიშვილი; გიორგი მიქაუტაძე; ნინო სანდოძე; პაატა სილაგაზე; გიორგი ტყავაძე; ნინო ქადაგიძე; მიხეილ ჩინჩალაძე; მარიამ ცისკაძე. იუსტიციის საბჭოს არამოსამართლე წევრი, ნაზი ჯანეზაშვილი და არასამთავრობო სექტორის ნაწილი მათ "ჩინჩალაძის კლანად" მოიხსენიებს.

27 დეკემბერს იურიდიულ საკითხთა კომიტეტის თავმჯდომარე, ეკა ბესელია გადადგა. მისი თქმით, ამით უზენაესი სასამართლოს მოსამართლეების დამტკიცებას შეუშალა ხელი.

ამავე თემაზე: სასამართლოს სუიციდად შეფასებული გადაწყვეტილება და უვადო მოსამართლეობის 10 კანდიდატი