საქართველოს პარლამენტის იურიდიულ საკითხთა კომიტეტის წევრის, გედევან ფოფხაძის თქმით, მის ყოფილ თავმჯდომარეს, ეკა ბესელიას პირობა უნდა მისცენ, რომ უზენაესი სასამართლოს მოსამართლეები გამჭვირვალე პროცესით შეირჩევიან. ამის შესახებ ფოფხაძემ პარლამენტში განაცხადა.

"მე მგონია, რომ ეკა ბესელიას სურვილი დაკავშირებულია ჩვენი ქვეყნის მომავალთან და იმასთან, რომ იურიდიულმა კომიტეტმა ყველაფერი გააკეთოს, რომ საქართველოს მართლმსაჯულება არ ჩავარდეს საეჭვოდ შერჩეული საეჭვო ადამიანების ხელში. ეს არის ეკა ბესელიას პოლიტიკური ნება და ყველაზე უფრო მორალური გადაწყვეტილება, ეკას უნდა დავუჭიროთ მხარი და მივცეთ სრული პირობა და გარანტია, რომ პროცესი რომელიც მოსამართლეების შერჩევასთაა დაკავშირებული იქნება ღია გამჭვირვალე", — თქვა ფიფხაძემ.

დღეს, 27 დეკემბერს იურიდიულ საკითხთა კომიტეტის თავმჯდომარე, ეკა ბესელია გადადგა. მისი თქმით, ამით უზენაესი სასამართლოს მოსამართლეების დამტკიცებას შეუშალა ხელი. მისი განმარტებით, ის მას შემდეგ გადადგა, რაც მისმა მოადგილემ, ვანო ზარდიაშვილმა თანამდებობების დატოვების მოთხოვნით მიმართა. ბესელიას გადადგომის შემდეგ ზარდიაშვილს მოუწევდა ამ თანამდებობაზე მუშაობა.

იუსტიციის უმაღლესმა საბჭომ უზენაესი სასამართლოს მოსამართლეობის 10 კანდიდატი წარადგინა. ამის მიუხედავად, დღემდე არ არსებობს პროცედურა, რომლითაც იუსტიციის უმაღლესმა საბჭომ მოსამართლეობის კანდიდატები უნდა წარადგინოს. ამ მიზეზით, არასამთავრობო ორგანიზაციების ნაწილსა და საბჭოს არამოსამართლე წევრებს პროცესის ობიექტურობასა და მიუკერძოებლობაზე კითხვები უჩნდებათ.

დასახელებულ კანდიდატებს შორის არიან: თამარ ალანია; მერაბ გაბინაშვილი; დიმიტრი გვრიტიშვილი; გიორგი მიქაუტაძე; ნინო სანდოძე; პაატა სილაგაზე; გიორგი ტყავაძე; ნინო ქადაგიძე; მიხეილ ჩინჩალაძე; მარიამ ცისკაძე.

იუსტიციის საბჭოს არამოსამართლე წევრი, ნაზი ჯანეზაშვილი და არასამთავრობო სექტორის ნაწილი მათ "ჩინჩალაძის კლანად" მოიხსენიებს.

ამავე თემაზე: სასამართლოს სუიციდად შეფასებული გადაწყვეტილება და უვადო მოსამართლეობის 10 კანდიდატი