აშშ-ს სასამართლომ დააკისრა ჩრდილოეთ კორეას, რომ $500 მილიონი გადაუხადოს ამერიკელი სტუდენტის, ოტო ვარმბაიერის ოჯახს, რომელიც ჩრდილოეთ კორეის ციხიდან გათავისუფლების შემდეგ მალევე გარდაიცვალა. სასამართლოs გადაწყვეტილებაში ნათქვამია, რომ ჩრდილოეთ კორეა ვარმბაიერის დატყვევებაში, წამებასა და სიკვდილშია პასუხისმგებელი.

ვარმბაიერების ოჯახმა კოლუმბიის სასამართლოში სარჩელი 2018 წლის აპრილში შეიტანა. ისინი ამტკიცებდნენ, რომ 22 წლის სტუდენტი ჩრდილოეთ კორეის ციხეში უკანონოდ იყო დატყვევებული, რამაც მისი სიკვდილი გამოიწვია. მშობლების განცხადებაში ნათქვამია, რომ მათი შვილი სამართალდამცავების მხრიდან წამების მსხვერპლი იყო.

22 წლის ამერიკელი სტუდენტი, ოტო ვარმბაიერი 2016 წლის იანვარში, ფხენიანის აეროპორტში დააკავეს მაშინ, როდესაც ის ჩრდილო კორეის დასატოვებლად ემზადებოდა.

ვირჯინიის უნივერსიტეტის სტუდენტი ჩრდილო კორეის დედაქალაქ ფხენიანში 29 დეკემბერს ჩავიდა. პირველ იანვარს მან სასტუმროს კედლიდან, რომელშიც რჩებოდა, პოსტერი ჩამოხსნა. ვარმბაიერის ქმედება ვიდეოკამერებმა დააფიქსირეს.

ვარმბაიერს ბრალად ედებოდა ჩრდილოეთ კორეის რესპუბლიკის წინააღმდეგ მტრული ქმედება. დაკავების დღეს ის პრესისთვის გამართულ კონფერენციაზე წარსდგა, სადაც თქვა, რომ ნანობს თავის საქციელს. 2016 წლის 16 მარტს მას ჩრდილოეთ კორეის სასამართლომ 15 წლით მძიმე შრომა მიუსაჯა.

17-თვიანი პატიმრობის შემდეგ, სამშობლოში დაბრუნებიდან რამდენიმე დღეში, ამერიკული სტუდენტი გარდაიცვალა. ამერიკელმა ექიმებმა სტუდენტის სხეულზე წამების კვალი ვერ აღმოაჩინეს, თუმცა ტომოგრაფიულმა გამოკვლევამ ტვინის დაზიანება და გულის უკმარისობა აჩვენა.

ჩრდილოეთ კორეა წამების ფაქტს უარყოფდა. ისინი აცხადებდნენ, რომ ვარმბაიერს "საერთაშორისო ნორმებთან შესაბამისად" ეპყრობოდნენ. მათივე თქმით, საპატიმროში ის ბოტულიზმით დაავადდა, თუმცა ამერიკელმა ექიმებმა ვარმბაერის სხეულში დაავადების კვალი ვერ აღმოაჩინეს.