ამერიკელი სტუდენტის ოტო ვარმბაიერის გარდაცვალების შემდეგ, ჩრდილოეთ კორეის მედიამ განაცხადა, რომ მისი გარდაცვალება მათთვისაც იდუმალებითაა მოცული. ინფორმაციას CNN ავრცელებს

ჩრდილოეთ კორეის ტელევიზიაში, პარასკევს გამოაცხადეს, რომ ვარმბაიერს მკურნალობდნენ შიდა კანონმდებლობის მიხედვით და გაურკვეველია, მათთვის, თუ რატომ აცხადებს ამერიკული მხარე, თითქოს სტუდენტს აწამებდნენ, ან ცუდად ეპყრობოდნენ.

"ის ფაქტი, რომ ვარმბაიერი, რომელიც ჯანმრთელად იყო, ამერიკაში დაბრუნებიდან ერთ კვირაზე ნაკლებ დროში გარდაიცვალა, ძალიან უცნაურია ჩვენთვის" - აცხადებს სააგენტო.

ვარმბაიერი კომაში იყო, როდესაც ჩრდილოეთ კორეამ მისი გათავისუფლება გადაწყვიტა. ის კომაში ერთი წლის განმავლობაში იყო. ჩრდილოეთ კორეის განცხადებით, ვარმბაიერის ეს მდგომარეობა ბოტულიზმმა და ძილის წამალმა გამოიწვია, რაც ამერიკელმა ექიმებმა არ დაადასტურეს.

ოფიციალური ინფორმაციით, ვარმბაიერს ტვინის მძიმე დაზიანება ჰქონდა მიღებული და მისი ორგანიზმი დასუსტებული იყო.

ოტო ვარმბაიერი 2016 წლის 2 იანვარს ფხენიანის აეროპორტში დააპატიმრეს, როდესაც ჩრდილოეთ კორეაში ხუთღიანი ტურის შემდეგ, ჯგუფთან ერთად, ტურისტის სტატუსით ჯერ პეკინში და შემდეგ ჰონგ-კონგში ჯგუფელებთან მიდიოდა.

ვარმბაიერს გასულ წელს 15 წლით მძიმე შრომა მიუსაჯეს, ჩრდილოეთ კორეის სასტუმროს კედლიდან პროპაგანდისტული შინაარსის პოსტერის მოპარვის გამო.

დაპატიმრების შემდეგ, ვარმბაიერი ჩრდილოეთ კორეაში გამართულ კონფერენციაზე ემოციურად წარსდგა, ბრალი აღიარა და გადარჩენა ითხოვა:

"მადლობა, რომ ამ კონფერენციის გამართვის საშუალება მომეცით, მადლობა ჩრდილო კორეის მთავრობას. ბოდიშს ვიხდი ჩემს მიერ ჩადენილი დანაშაულისთვის, გევედრებით მაპატიოთ და გევედრებით გადამარჩინოთ. მე ჩემი ცხოვრების ყველაზე საშინელი შეცდომა დავუშვი, რადგან მანიპულაციის ქვეშ ვიყავი, გთხოვთ, იმოქმედეთ და გადამარჩინეთ".

ჩრდილოეთ კორეიდან დახსნილი ტყვეები ამბობენ, რომ, მათ წარდგენილი ბრალის აღიარებას წამებით აიძულებენ.

ოჯახმა ვარმბაიერის გვამის გაკვეთაზე უარი განაცხადა. მათი თქმით, 22 წლის ამერიკელის სიკვდილი ჩრდილოეთ კორეაში წამებამ გამოიწვია:

"ამერიკაში დაბრუნების შემდეგ, ოტო ვერ ლაპარაკობდა, ვერ ხედავდა და არ რეაგირებდა, როცა მას ველაპარაკებოდით. სამწუხაროდ, იმ საშინელი მოპყრობის შემდეგ, რაც ჩვენმა შვილმა ჩრდილოეთ კორეელების ხელებში გამოიარა, მისი გადარჩენა შეუძლებელი აღმოჩნდა და ჩვენ ახლა ამ ტრაგიკული რეალობის წინაშე ვართ".

ოჯახის წევრებმა ვარმბაიერის მდგომარეობის შესახებ მისი გათავისუფლების დღეებში შეიტყვეს.