შინაგან საქმეთა მინისტრის მოადგილის, ნათია მეზვრიშვილის განცხადებით, ნაციონალური მოძრაობის ერთ-ერთი ლიდერის, დავით კირკიტაძის სახლთან პოლიციის გამოჩენა გუშინ, 16 დეკემბერს ველისციხეში მომხდარ დაპირისპირებას უკავშირდება.

ნათია მეზვრიშვილის თქმით, გასაკვირი არ არის, თუ რატომ დაინტერესდა გამოძიება დავით კირკიტაძით.

"მიიღებს, ალბათ, ბატონი კირკიტაძე საგამოძიებო მოქმედებებში მონაწილეობას — ყოველ შემთხვევაში, ჩვენ ამის სურვილი გვაქვს და კანონით გათვალისწინებულ ზომებს მივმართავთ. შედეგების შესახებ საზოგადოებას დამატებით ეცნობება", — განაცხადა მეზვრიშვილმა.

მან თქვა, რომ ამ ეტაპზე უცნობია, კონკრეტულად, რა საგამოძიებო მოქმედებაში იღებს მონაწილეობას. მინისტრის განცხადებით, პოლიციელებზე ძალადობის გარდა ველისციხეში ჟურნალისტური საქმიანობაში ხელის შეშლის ფაქტებიც დაფიქსირდა.

"გვარებით და სახელებით, სამწუხაროდ, ახლა მე არ მინდა, რომ მოვლენებს წინ გავუსწრო. ყველა იმ ადამიანს, ვინც გუშინ რაიმე ფორმით კანონს არღვევდა, პოლიციაში დავიბარებთ" — განაცხადა ნათია მეზვრიშვილმა.

მან პოლიციელებზე ძალადობის მუხლით დაწყებულ გამოძიებაზეც ისაუბრა. მისი თქმით, გუშინ, 16 დეკემბერს მთელი ღამის განმავლობაში სწავლობდნენ ყველა გავრცელებულ ვიდეომასალასა და ინფორმაციას.

"დიახ, შინაგან საქმეთა მინისტრმა განაცხადა, რომ მომხდარი სამართლებრივად შეფასდებოდა და ყველა პირის პასუხისმგებლობის საკითხი დადგებოდა. გარკვეული პირები იდენტიფიცირებულები არიან. ამ ადამიანებიდან ნაწილს საგამოძიებო ორგანოში დავიბარებთ. რა თქმა უნდა, გამოვიყენებ იძულების ღობისძიებებსაც თუ ამის საფუძველი გამოიკვეთა", — განმარტა ნათია მეზვრიშვილმა.

გუშინ, 16 დეკემბერს ინაუგურაციის პარალელურად ხმაური იყო თბილისი-კახეთის გზაზე. ერთმანეთს გაერთიანებული ოპოზიციის წევრები და პოლიცია დაუპირისპირდა. სოფელ ველისციხეში მდგომარეობა მას შემდეგ დაიძაბა, რაც გაერთიანებულ ოპოზიციას გზა გადაუკეტა პოლიციამ და თელავში ჩასასვლელად ყვარლის შემოვლითი გზით წასვლა ურჩია. ამ გზაზე ოპოზიციას ავტობუსები ელოდებოდნენ, რომლებიც აქციის მონაწილეებს თელავის მერიის მიერ პროტესტისთვის განსაზღულ ადგილზე გადაიყვანდნენ.

გაერთიანებული ოპოზიციის პოზიციით, შსს-მ შეზღუდა კონსტიტუციური უფლება, გამოხატვის თავისუფლება. შსს-სა და ქართული ოცნების წარმომადგენლები კი ერთხმად აცხადებდნენ, რომ გაერთიანებულმა ოპოზიციამ პროვოკაცია მოაწყო და მათთვის თელავში ჩამოსვლა და აქციის ჩატარების უფლება არავის შეუზღუდია. დაპირისპირების შედეგად დაშავდნენ, როგორც პოლიციელები ისე აქციის მონაწილეები.

საქართველოს მეხუთე პრეზიდენტის სალომე ზურაბიშვილის ინაუგურაციის დასრულების შემდეგ, შინაგან საქმეთა მინისტრმა განაცხადა, რომ დაისჯება ყველა, ვისი ბრალეულობაც გამოიკვეთება. საბოლოოდ, სალომე ზურაბიშვილის ინაუგურაციის პარალელურად ოპოზიციის დაგეგმილი აქცია არ ჩატარდა.