2018 წელს წინა ორ წელთან შედარებით მედიასაშუალებების პოლარიზაციამ პიკს მიაღწია. ასეთია საქართველოს ჟურნალისტური ეთიკის ქარტიის მიერ ბოლო სამი წლის განმავლობაში საარჩევნო პერიოდში ჩატარებული კვლევის ერთ-ერთი მიგნება.

მონიტორინგის მიხედვით, იმედის მსგავსი იყო საზოგადოებრივი მაუწყებლის სარედაქციო პოლიტიკა 2017‐2018 წლებში — არც ის ყოფილა კრიტიკული ხელისუფლების მიმართ.

"რჩებოდა შთაბეჭდილება, რომ როგორც იმედი, ისე პირველი არხი ხელისუფლების ნარატივის გატარებას ცდილობდა. ეს განსაკუთრებით ტოქშოუებში იგრძნობოდა. მინისტრების თუ ხელისუფლების სხვა წარმომადგენელთა სტუმრობისას ნაცვლად ცხარე დისკუსიისა და კრიტიკული კითხვებისა, წამყვანები ფაქტობრივად ზოგად თემებზე საუბარს სთავაზობდნენ, რათა რესპონდენტებს სასურველი მიმართულებით განევრცოთ და ეთერი საკუთარი მოსაზრებების გასავრცელებლად გამოეყენებინათ", — აღნიშნულია კვლევაში.

ამავე დოკუმენტის მიხედვით, წელს მმართველი პარტიის მიერ მხარდაჭერილი კანდიდატის, სალომე ზურაბიშვილის ნეგატიური გაშუქებით ერთ მხარეს აღმოჩნდა რუსთავი 2, მეორე მხარეს კი გრიგოლ ვაშაძის უარყოფითად წარმოჩენით იმედი, საზოგადოებრივი მაუწყებელი და ობიექტივი. ანგარიშის მიხედვით, TV პირველი ცდილობს იყოს მიუკერძოებელის ტელევიზიის ადგილის დაკავებას, ობიექტივი კი პატრიოტთა ალიანსის პლატფორმა იყო.

"ზოგადად სიღრმისეული გაშუქება მიმდინარე ამბების და ტოქშოუებში საკითხების ანალიზის დაბალი ხარისხი ქართული ტელემედიის გამოწვევად რჩება", — აღნიშნულია კვლევაში.

ანგარიში მომზადებულია ევროკავშირისა (EU) და გაეროს განვითარების პროგრამის (UNDP) ხელშეწყობით.