11 დეკემბერს ადამიანის უფლებებისა და საკონსტიტუციო სამართლის კლინიკა (მის: A410, ი.ჭავჭავაძის გამზირი N32) ოფიციალურად გაიხსნა და დაინტერესებულ პირებს მიაწვდის ინფორმაციას სამომავლო საქმიანობის, მუშაობის პრინციპების, გეგმებისა და მიმდინარე საქმეების შესახებ.

კლინიკა 2018-2019 სასწავლო წლიდან ფუნქციონირებს და მისი მთავარი მისია სამართლებრივი ცოდნის შექმნა, გადაცემა, გამოყენება, სტუდენტებისთვის საკონსტიტუციო სამართლისა და ადამიანის უფლებების სფეროში სწავლების თეორიული, პრაქტიკული და საადვოკატო უნარ-ჩვევების გამომუშავება, იურიდიული აზროვნების განვითარება და ღირებულებების ჩამოყალიბებაა.

ღონისძიებას დაესწრნენ ილიას სახელმწიფო უნივერსიტეტის რექტორი გიგა ზედანია, სამართლის სკოლის დეკანი ირაკლი ფორჩხიძე, ამერიკის შეერთებული შტატების საერთაშორისო განვითარების სააგენტოსა და აღმოსავლეთ-დასავლეთის მართვის ინსტიტუტის "კანონის უზენაესობის მხარდაჭერა საქართველოში" პროგრამის წარმომადგენლები.

ილიას სახელმწიფო უნივერსიტეტის ადამიანის უფლებებისა და საკონსტიტუციო სამართლის კლინიკა ილიას სახელმწიფო უნივერსიტეტისა და აღმოსავლეთ-დასავლეთის მართვის ინსტიტუტის კანონის უზენაესობის მხარდაჭერა საქართველოში (USAID/PROLoG) პროგრამის თანამშრომლობის ფარგლებში შეიქმნა.

კლინიკა ორი მიმართულებით მუშაობს, ესენია: ადამიანის უფლებები და საკონსტიტუციო სამართალი. მისი მიზანია, გააღრმაოს სტუდენტებში ადამიანის უფლებების, როგორც უზენაესი ღირებულებების, პატივისცემა და ხელი შეუწყოს საკონსტიტუციო სამართლისა და ადამიანის უფლებების სფეროში სამართალწარმოების განვითარებას.

"დღეს ძალიან მნიშვნელოვანია ჩვენთვის, რადგან ილიაუნიში იხსნება ადამიანის უფლებებისა და საკონსტიტუციო სამართლის კლინიკა. ეს იქნება სივრცე, სადაც ჩვენი სტუდენტები გაივლიან პრაქტიკას იმ ორ სფეროში, რომელიც ილიაუნის სამართლის სკოლისთვის განსაკუთრებით მნიშვნელოვანი და პრიორიტეტულია", - ამბობს ილიაუნის რექტორი გიგა ზედანია.

კლინიკა ფოკუსირებულია საკონსტიტუციო სამართლისა და ადამიანის უფლებების სფეროში სტრატეგიულად მნიშვნელოვანი და სოციალურად დაუცველი, დისკრიმინაციის ან/და ძალადობის მსხვერპლი მოქალაქეების საქმეების სამართალწარმოებაზე.

"ამ კლინიკის გახსნა ჩვენთვის ძალიან მნიშვნელოვანია, რადგან ის რამდენიმე მიზანს ემსახურება. პირველ რიგში, ჩვენი სტუდენტები გამოიმუშავებენ მნიშვნელოვან უნარებს, მეორე მხრივ კი, ჩვენ მოვემსახურებით იმ ადამიანებსა და ჯგუფებს, რომლებიც განიცდიან დისკრიმინაციას საზოგადოებაში და ქვეყანაში", - თქვა ირაკლი ფორჩხიძემ, ილიაუნის სამართლის სკოლის დეკანმა.

კლინიკის საქმიანობის ფარგლებში ილიას სახელმწიფო უნივერსიტეტის სამართლის სკოლის მაგისტრანტები და მომავალში საბაკალავრო საფეხურის დამამთავრებელი კურსის სტუდენტები, რომლებსაც გავლილი აქვთ სავალდებულო ორიენტაცია, აკადემიური კურსის პარალელურად, კვალიფიციური იურისტების მეთვალყურეობით გასცემენ უფასო იურიდიულ კონსულტაციას, ამზადებენ იურიდიულ დოკუმენტებს სოციალურად დაუცველი მოქალაქეებისთვის, აწარმოებენ საქმეებს, როგორც ადმინისტრაციულ ორგანოებში, ასევე საკონსტიტუციო და საერთო სასამართლოებში.