ევროპული კავშირის მართლმსაჯულების სასამართლოს გადაწყვეტილებით, დიდ ბრიტანეთს ერთპიროვნულად, სხვა ქვეყნებთან შეუთანხმებლად შეუძლია, ბრექსიტი გააუქმოს. სასამართლომ გადაწყვეტილება დიდი ბრიტანეთის თემთა პალატაში ბრექსიტის საკითხის განხილვამდე ერთი დღით ადრე, 10 დეკემბერს მიიღო. ბევრი ფიქრობს, რომ თემთა პალატა ბრექსიტის შეთანხმებას მხარს არ დაუჭერს.

ქვეყნის პრემიერ-მინისტრი, ტერეზა მეი ცდილობს, რომ პარლამენტის წევრები მხარდაჭერაში დაარწმუნოს. გარდა ამისა, შეთანხმების წინააღმდეგ ხმას აძლევენ არა მხოლოდ ბრექსიტის მოწინააღმდეგეები, არამედ მისი მომხრეთა ნაწილი კონსერვატიული პარტიიდან, რომლებიც მიიჩნევენ, რომ დოკუმენტი უვარგისია.

ჯერ უცნობია რა მოხდება იმ შემთხვევაში თუ პარლამენტი ბრექსიტის შეთანხმებას მხარს არ დაუჭერს. თუმცა შეიძლება ვივარაუდოთ, რომ ტერეზა მეის ნდობის საკითხი კითხვის ნიშნის ქვეშ დადგება.

ევროკავშირის ლიდერებმა დიდი ბრიტანეთის ევროკავშირიდან გასვლისა და სამომავლო ურთიერთობების შეთანხმებას მხარი 25 ნოემბერს დაუჭირეს. შეთანხმება, რომელიც ჯერ დიდი ბრიტანეთის პარლამენტმა უნდა დაამტკიცოს, ევროკავშირიდან გასვლის პროცედურების მნიშვნელოვანი დასაწყისია.

ტერეზა მეის თქმით, ეს შეთანხმება "დიდი ბრიტანეთის წარმატებულ მომავალს განსაზღვრავს". ბრიუსელში სიტყვით გამოსვლისას, პრემიერ-მინისტრმა მეიმ მიმართა ყველას, ვინც "დარჩენას" და "გასვლას" მისცა ხმა, რომ გაერთიანდნენ ამ შეთანხმების უკან და "ბრექსიტზე კამათზე ნუ დაკარგავენ დროს".

დიდი ბრიტანეთი ევროკავშირს 1973 წელს შეუერთდა და პირველი ქვეყანაა, რომელიც მას დატოვებს. ის ევროკავშირიდან საბოლოოდ 2019 წლის 29 მარტს უნდა გამოვიდეს. დოკუმენტის პროექტში საუბარია 21-თვიან გარდამავალ პერიოდზე და ე.წ. გაყრის კანონპროექტის დეტალებზე, რომლის მიხედვითაც ბრიტანეთმა ევროკავშირს 39 მილიარდი ფუნტ სტერლინგი უნდა გადაუხადოს.

ბრექსიტის შეთანხმების განხილვას უთანხმოების გარეშე არ ჩაუვლია ქვეყნის შიგნით. უთანხმოების ერთ-ერთი მთავარი საკითხი იყო ჩრდილოეთ ირლანდიისა და ირლანდიის რესპუბლიკის საზღვარი. მხარეები ვერ თანხმდებოდნენ ბრექსტისის შემთხვევაში როგორ აეცილებინათ საზღვარზე ფიზიკური შემოწმება.

დიდი ბრიტანეთიც და ევროკავშირიც მიიჩნევენ, რომ ირლანდიის რესპუბლიკასა და ჩრდილოეთ ირლანდიას შორის სრულყოფილი საზღვარი არ უნდა არსებობდეს, რაც პასპორტის კონტროლსა და მკაცრ შემოწმებას გულისხმობს. ბოლო შეთანხმებით კი, საზღვარი ღია იქნება ეს კი "მკაცრი ბრექსიტის" პრინციპებს ღალატობს. 14 ნოემბერს დიდი ბრიტანეთის ხელისუფლებამ ბრექსიტის პროექტს მხარი დაუჭირა. ამ შეთანხმებას მინისტრთა კაბინეტის 11-მა წევრმა არ დაუჭირა მხარი, მათგან ორი კი გადადგა, მათ შორის, ბრექსიტის საკითხების მინისტრი.

ამავე თემაზე: