შინაგან საქმეთა სამინისტროს ცნობით, რომ პოლიციელი, რომელმაც საპროტესტო აქციების დროს თვალში მხედველობა დაკარგა, გიორგი ზაბახიძეა.

უწყების ინფორმაციით, 2024 წლის 29 ნოემბერს, რუსთაველის გამზირზე გამართული აქციის მიმდინარეობისას, აქციის მონაწილეთა მხრიდან ნასროლი ბლაგვი საგნის მოხვედრის შედეგად, მან თვალის არეში მძიმე დაზიანება მიიღო, რის შემდეგაც, ის სასწრაფომ სამედიცინო დაწესებულებაში გადაიყვანა გადაუდებელი დახმარებისთვის.

უწყების ცნობით, ამ ეტაპზე დანაშაულის ჩამდენი პირი იდენტიფიცირებული არ არის.

"ჩატარებული კვლევების შედეგად დადგინდა, რომ ბლაგვი საგნის მოხვედრის შედეგად, პოლიციელმა მარჯვენა თვალში მხედველობა დაკარგა.

თბილისში რამდენიმე კლინიკის შესაბამისი პროფილის მედიკოსების დასკვნებით დადგინდა, რომ თვალი ოპერაციას და განკურნებას არ ექვემდებარება, რის შემდგომაც შინაგან საქმეთა სამინისტროს ჯანმრთელობის დაცვის სამსახურის მიერ სამედიცინო მასალა გადაიგზავნა ავსტრიის, ისრაელის და თურქეთის რამდენიმე კლინიკაში.

შინაგან საქმეთა სამინისტროს თანამშრომელი დამატებითი კვლევებისა და მკურნალობის ჩატარების მიზნით გაიგზავნა, ანკარაში კლინიკა "გიუვენში" და სტამბოლში კლინიკა "აჯიბადემში", თუმცა კლინიკების წამყვანი ოფთალმო-ქირურგების დასკვნით, მხედველობის აღდგენა შეუძლებელია.

მიღებული დაზიანების შედეგად პოლიციელმა მარჯვენა თვალში მხედველობა სრულად დაკარგა.

შინაგან საქმეთა სამინისტროს თანამშრომლის ჯანმრთელობის მძიმე დაზიანების ფაქტთან დაკავშირებით მიმდინარეობს ყველა შესაბამისი საპროცესო და საგამოძიებო მოქმედება.

ამ ეტაპზე დანაშაულის ჩამდენი პირი იდენტიფიცირებული არ არის", — აცხადებს შს მინისტრის მოადგილე ალექსანდრე დარახველიძე.

შეგახსენებთ, 15 აპრილს, ტელეკომპანიებმა იმედი და რუსთავი 2 გაავრცელეს ინფორმაცია, რომ პოლიციელმა, რომელსაც 29 ნოემბერს აქციაზე "აქტივისტებმა ბლაგვი საგანი ესროლეს", მხედველობა დაკარგა. მათი თქმით, "რადიკალური ოპოზიციის პროპაგანდისტულ მედიებს ფაქტი ამ დრომდე არ გაუშუქებიათ".

ასევე იხილეთ: